Tragjedi hekurudhore në Spanjë: 39 viktima nga përplasja e trenave
E Hënë 19 Janar 2026, 09:09
Dritare.net
Të paktën 39 persona kanë humbur jetën dhe dhjetëra të tjerë janë plagosur pas një përplasjeje të rëndë mes dy trenave në jug të Spanjës, aksidenti më i rëndë hekurudhor në vend në më shumë se një dekadë, njoftoi Garda Civile spanjolle.
Ngjarja ndodhi të dielën në mbrëmje pranë qytetit Adamuz, në provincën e Kordobës, kur një tren që udhëtonte nga Málaga drejt Madridit doli nga shinat në një segment të drejtë të linjës dhe kaloi në krahun e kundërt, duke u përplasur me një tren tjetër që po udhëtonte nga Madridi drejt Huelvës.
Në të dy trenat ndodheshin rreth 400 pasagjerë dhe anëtarë të stafit. Shërbimet emergjente trajtuan 122 persona, ndërsa 48 prej tyre, përfshirë pesë fëmijë, mbeten të shtruar në spital. Dymbëdhjetë të plagosur ndodhen në gjendje kritike në kujdes intensiv.
Ministri spanjoll i Transportit, Óscar Puente, e përshkroi aksidentin si “jashtëzakonisht të çuditshëm”, duke theksuar se ekspertët hekurudhorë janë të habitur nga mënyra se si ndodhi përplasja. Një hetim zyrtar është hapur, ndërsa shkaqet nuk pritet të bëhen të ditura për të paktën një muaj.
Ekipet e shpëtimit raportuan vështirësi të mëdha për shkak të mbetjeve të përthyera të trenave. Shumica e viktimave dhe të plagosurve ndodheshin në vagonët e parë të trenit të dytë. Dëshmitarët e përshkruan përplasjen si një “tërmet”.
Të gjitha shërbimet hekurudhore mes Madridit dhe Andaluzisë u pezulluan pas aksidentit dhe pritet të mbeten të mbyllura gjatë së hënës.
Kryeministri i Spanjës, Pedro Sánchez, tha se vendi po përjeton një “natë dhimbjeje të thellë”, ndërsa Mbreti Felipe VI dhe Mbretëresha Letizia shprehën ngushëllimet e tyre për familjet e viktimave. Mesazhe solidariteti erdhën edhe nga liderë evropianë. Kryeministri shqiptar Edi Rama shkroi këtë mesazh në platformën X:
"I dashur Pedro,
Me trishtim të thellë kam marrë lajmin për aksidentin tragjik hekurudhor të ndodhur në Adamuz.
Në emër të popullit të Shqipërisë dhe në emrin tim personal, dëshiroj të shpreh ngushëllimet e mia më të sinqerta për familjet e viktimave dhe solidaritetin tim me popullin dhe Qeverinë e Spanjës në këtë moment dhimbjeje.
Mendimet tona janë me ata që kanë humbur të dashurit e tyre dhe me të gjitha ekipet që po punojnë pa u lodhur në përballimin e kësaj tragjedie", shkroi kryeministri Edi Rama.
Ky aksident kujton tragjedinë e vitit 2013 në Galici, ku humbën jetën 80 persona. Spanja ka rrjetin e dytë më të madh të trenave me shpejtësi të lartë në botë, pas Kinës./L.F-dritare.net
