Tension para Kryesisë së Kuvendit, protestuesit përplasen me Erion Braçen
Friday 2 October 2026, 13:01
Dritare.net
Tensione janë shënuar këtë të premte para Kryesisë së Kuvendit, ku qytetarë që kundërshtojnë bashkimin e Bashkisë së Memaliajt me Tepelenën kanë protestuar kundër ndryshimeve të propozuara në kuadër të reformës administrativo-territoriale.
Protestuesit u mblodhën që prej orës 10:00, në të njëjtën kohë kur në Komisionin e Ligjeve nisi diskutimi për reformën territoriale dhe propozimet për ndryshimin e hartës së bashkive.
Gjatë protestës, qytetarët iu drejtuan deputetit socialist Erion Braçe, duke kërkuar që të merret në konsideratë kundërshtimi i tyre për bashkimin e Memaliajt me Tepelenën. Mes protestuesve dhe deputetit pati replika, ndërsa situata u shoqërua për disa momente me tension.
Protestuesit kanë shprehur kundërshtimin e tyre ndaj ndryshimit të propozuar të ndarjes administrative, duke kërkuar që Memaliaj të vijojë të funksionojë si bashki më vete.
Protesta zhvillohet paralelisht me mbledhjen e Komisionit të Ligjeve, ku reforma administrativo-territoriale ka rikthyer përplasjet politike mes mazhorancës dhe opozitës, si për procedurën e ndjekur, ashtu edhe për propozimet që prekin hartën e njësive të qeverisjes vendore./L.F-dritare.net
