Tension para Kryesisë së Kuvendit, protestuesit përplasen me Erion Braçen
Friday 2 October 2026, 13:01
Dritare.net
Tensione janë shënuar këtë të premte para Kryesisë së Kuvendit, ku qytetarë nga Memaliaj protestuan kundër bashkimit të kësaj bashkie me Tepelenën, në kuadër të reformës administrativo-territoriale.
Gjatë protestës, deputeti socialist Erion Braçe është afruar pranë qytetarëve për të komunikuar me ta dhe për të dëgjuar kundërshtimet e tyre lidhur me ndryshimin e hartës administrative.
Por takimi është shoqëruar me tensione, pasi disa prej protestuesve e kanë sulmuar verbalisht deputetin dhe e kanë fyer gjatë përplasjes mes palëve.
Njeri prej banorëve i ka hedhur ujë Braçes në fytyrë, ndërkohë që në momentet e tensionit deputeti i opozitës Tritan Shehu, ndërhyri duke e larguar Braçen, larg turmës!
Protesta po zhvillohet paralelisht me mbledhjen e Komisionit të Ligjeve, ku po diskutohen propozimet për reformën administrativo-territoriale. Ndryshimet e propozuara kanë sjellë debate të forta politike mes mazhorancës dhe opozitës, ndërsa qytetarët e Memaliajt kanë shprehur publikisht kundërshtimin e tyre ndaj bashkimit me Tepelenën. /L.F-dritare.net
