Lia Tosi: Mirënjohje për popullin shqiptar, ata shpëtuan babain tim dhe 30 mijë ushtarë italianë!
E Enjte 23 Tetor 2025, 21:09
Dritare.net
Në vitin 1943, pas kapitullimit të Italisë fashiste, 20 mijë ushtarë italianë u strehuan në shtëpitë e shqiptarëve, për t’i shpëtuar pushkatimeve dhe kampeve të përqendrimit nazist. 2000 prej tyre luftuan krah partizanëve shqiptarë. Askush nuk iu dorëzua gjermanëve sepse ishin në besë të shqiptareve.
Sot ekskluzivisht në Dritare TV u zbulua historia e jashtëzakonshme e Carlo Tozit, një mjeku dhe oficeri italian, udhëtimi i të cilit gjatë Luftës së Dytë Botërore e çoi nga fronti grek në zemër të rezistencës shqiptare. Përmes kujtimeve të së bijës, Lia Tosi shpaloset një kapitull i panjohur i historisë italo-shqiptare, një dëshmi e guximit, mbijetesës dhe lidhjeve njerëzore të farkëtuara në mes të kaosit të luftës.
Pse është e rëndësishme të tregohet kjo histori sot?
Për vajzën e Carlo Tozit, përgjigja është e qartë. Për të nxjerrë në dritë një kapitull të lënë në harresë dhe për të nderuar sakrificat e bëra.
Ajo shpreh indinjatën e saj për faktin se historia e partizanëve italianë në Shqipëri shpesh anashkalohet ose trajtohet sipërfaqësisht në librat e historisë. Përmes organizimit të konferencave dhe mbledhjes së dëshmive, ajo ka luftuar për t'i dhënë kësaj historie vendin që meriton. Mbi të gjitha, ky është një homazh dhe një falënderim i përzemërt për popullin shqiptar. Pavarësisht se ishin vetë nën pushtim, shqiptarët treguan një humanizëm të jashtëzakonshëm duke shpëtuar, strehuar dhe luftuar përkrah mijëra ushtarëve italianë.
Ky rrëfim është një thirrje për të kujtuar jo vetëm tmerret e luftës, por edhe aktet e mëdha të miqësisë dhe solidaritetit që lulëzuan në rrethanat më të vështira./dritare.net
