Një këshillë për Ermal Mamaqin nga unë “pensionistja”!
E Martë 21 Prill 2020, 12:12
Dritare.net
Nga Xheni Hatillari!
Kur Umberto Eco ndërroi jetë në 2016, unë kisha pak që lexoja veprën e tij. Rastësitë e mëdha, jo? Se fundja, unë jam ai brezi që u rritëm me faktin që leximi qe një gjë e mirë, që të hapë horizonte, biles çdo verë na jepnin lista të gjata romanesh në shkollë për t'i lexuar e ky mbeti zakon i përvitshëm edhe teksa u rrita. Pra, vlerat mësohen dhe ngelin me ty gjithë jetën. Që mos të humbas fillin siç bëjnë rëndom njerëz me influencë në vendin tonë, po i kthehem Eco-s (për të cilin bëra dhe një artikull asokohe plot pathos duke mos e ditur që sot do t'i rikthehesha me mërzi e dhimbje). Umberto Eco, citoj është shprehur kështu për dallaveraxhinjtë e rrjetit:
"Mediat sociale u kanë dhënë të drejtën e fjalës budallenjve. Më përpara ata flisnin vetëm në bare pas një gote me verë, pa e dëmtuar komunitetin. Ua mbyllnin menjëherë gojën, ndërsa tani kanë të njëjtën të drejtë fjale me një fitues të çmimit Nobel. Është pushtim nga budallenjtë''.
Ai me siguri e dinte çfarë na priste, çfarë mynxyrash do dëgjonim sot nga palo artistë e "motivues". Në fakt, sot kur u zgjova nga postimet e miqve të mi online, po po u zgjova ore, m’u hapën sytë, mbeta e tmerruar nga një video e Ermal Mamaqit.
Le të kuptohemi, ky nuk është artikulli i zakonshëm antikomformist sapo dikush bën një deklaratë të fortë. Ermali e ka mirë që e nis bisedën me shifra papunësie dhe me analizën e tij (?) për ecurinë e ekonomisë botërorë se si gjithçka do të marrë trajtë tjetër. Edhe me qasjen alla Tony Robbins, pak arrogante por që duket si "e vërteta e hidhur" mirë e ka se është teknikë e provuar që funksionon në masa para tij.
Por Ermali diçka nuk e ka mirë: që nuk lexon më romane. E di këtë se ndryshe humori i tij do kish pasur zhvillim krijues dhe jo vetëm financiar në investimet për filmat e tij. Ermal dhe Ermalët e tjerë, lexoni çfarë t'iu dojë zemra por mos kufizoni dijen me etiketa "pensionistë" ose jo. Unë do doja të lexoja si një pensioniste çdo ditë të jetës sime: të lëvizja mes rreshtash me dijen e një jetë dhe të merrja nga to edhe më shumë. Në fakt do doja edhe njëherë të lexoja romane që të isha e aftë sot të lexoja Dostojevskin duke e kuptuar apo të kuptoja gjësend duke lexuar veprën e Shekspirit.
Ju lutem, për hatër të dijes, ka njohuri që Ermali e as unë s'ia jep dot njeriu, as nëpërmjet videove as nëpërmjet pseudo-motivimit. Sot ngrihuni nga divani siç thotë Ermali, por uluni në kolltuk për të shijuar një roman të mirë. E drejtë është, shumica s'kanë kohë dhe mesazhet e gatshme në libra motivues si Napoleon Hill ta japin kafshatë në gojë, por pa mendim kritik, miqtë e mi dhe Ermal, kujdes, kjo kafshatë do t'iu mbesë në fyt./Dritare.net
