Hakmerret Irani. Sulmon objektet e gazit në Katar, tensione në gjithë rajonin
E Mërkurë 18 Mars 2026, 21:09
Dritare.net
Infrastruktura energjetike në vendet e Gjirit Persik është vënë sot në shënjestër të sulmeve, me zjarre të raportuara në objekte kyçe në Katar dhe kërcënime ajrore të neutralizuara në Arabinë Saudite, pas paralajmërimeve nga Garda Revolucionare Islamike e Iranit (IRGC).
Ministria e Brendshme e Katarit njoftoi se ekipet e mbrojtjes civile po ndërhyjnë për të shuar një zjarr në qytetin industrial Ras Laffan, një nga qendrat më të rëndësishme të përpunimit të gazit natyror dhe një shtyllë e ekonomisë së vendit, pas asaj që u cilësua si një goditje nga Irani.
Kompania shtetërore QatarEnergy konfirmoi se zona është goditur nga raketa, duke shkaktuar dëme të konsiderueshme. Sipas autoriteteve, të gjithë punonjësit janë të sigurt dhe nuk raportohet për viktima, ndërsa ekipet emergjente po punojnë për të vënë situatën nën kontroll.
Ministria e Jashtme e Katarit e cilësoi sulmin si një “përshkallëzim të rrezikshëm”, duke theksuar se ai përbën shkelje të sovranitetit të vendit dhe kërcënim për sigurinë rajonale.
Ndërkohë, Ministria e Mbrojtjes e Arabisë Saudite njoftoi se ka interceptuar katër raketa balistike mbi kryeqytetin Riad, ndërsa mbetje të tyre ranë në zona të ndryshme pa shkaktuar dëme. Po ashtu, u neutralizuan edhe dy dronë, një prej të cilëve synonte një impiant gazi në lindje të vendit.
Më herët, IRGC kishte paralajmëruar për “veprime të fuqishme” kundër kundërshtarëve të Iranit, duke akuzuar Shtetet e Bashkuara dhe Izraelin për sulme ndaj infrastrukturës së tij energjetike, përfshirë fushën e gazit South Pars, më e madhja në botë.
Situata është përshkallëzuar më tej pasi autoritetet iraniane u bënë thirrje punonjësve dhe banorëve pranë objekteve energjetike në Arabinë Saudite, Katar dhe Emiratet e Bashkuara Arabe të evakuohen, duke rritur frikën për sulme të tjera.
Këto zhvillime shënojnë një përshkallëzim të ndjeshëm të tensioneve në rajon, duke rrezikuar jo vetëm stabilitetin në Lindjen e Mesme, por edhe tregjet globale të energjisë./K.C/dritare.net
