Studimi: Çiklizmi ul rrezikun e demencës dhe Alzheimerit
E Shtunë 20 Shtator 2025, 18:06
Dritare.net
Çiklizmi nuk është vetëm i dobishëm për shëndetin fizik, xhepin dhe mjedisin, por mund të ndihmojë edhe në parandalimin e rënies së funksioneve njohëse. Një studim i ri, i botuar në revistën JAMA Network Open, tregon se të rriturit që përdorin biçikletën si mjet transporti kanë 19% më pak rrezik për të zhvilluar demencë dhe 22% më pak rrezik për Alzheimer, krahasuar me ata që përdorin mënyra joaktive udhëtimi si makina, autobusi apo treni.
Studimi analizoi të dhënat e rreth 480 mijë pjesëmarrësve nga Britania e Madhe, të cilët u ndoqën për një periudhë mesatare prej 13 vitesh. Gjatë kësaj kohe, mbi 8,800 persona zhvilluan demencë dhe gati 4,000 Alzheimer. Çiklistët rezultuan të kishin gjithashtu hipokamp më të madh, pjesa e trurit që lidhet me kujtesën dhe të nxënit.
Sipas autorëve, aktiviteti fizik është prej kohësh një faktor i lidhur me uljen e rrezikut të demencës, ndërsa çiklizmi sjell përfitime të shumëfishta: përmirëson qarkullimin e gjakut, ndihmon neuroplasticitetin, metabolizmin dhe kërkon një angazhim më të madh të trurit gjatë lëvizjes.
Megjithatë, studiuesit theksojnë se këto janë rezultate vëzhguese, që tregojnë lidhje por jo domosdoshmërisht shkak-pasojë. Faktorë të tjerë si gjendja shëndetësore, stili i jetesës apo predispozitat gjenetike mund të kenë luajtur rol. Për shembull, pjesëmarrësit që kishin gjene të lidhura me rrezik më të ulët për Alzheimer përfituan më shumë nga aktiviteti fizik.
Ekspertët rekomandojnë që të rriturit të synojnë 150 deri 300 minuta aktivitet aerobik mesatar ose 75 deri 150 minuta aktivitet intensiv në javë, sipas udhëzimeve të Organizatës Botërore të Shëndetësisë. Për ata që duan të nisin çiklizmin, sugjerohet të fillojnë me rrugë të shkurtra e të sigurta, gjithmonë me helmetë dhe pajisje mbrojtëse, ndërsa për më shumë siguri mund të përdoret edhe biçikleta stacionare.
“Edhe vetëm disa herë në javë, çiklizmi mund të bëjë diferencë për shëndetin e trurit,” theksojnë autorët e studimit./L.F-dritare.net
