Vilat qeveritare do të rijetëzohen për turizëm elitar!
E Mërkurë 4 Qershor 2025, 09:09
Dritare.net
Në hapje të fazës së dytë të konkursit ndërkombëtar për rikthimin në funksion të rezidencave qeveritare në Vlorë dhe Velipojë, Kryeministri Edi Rama theksoi rëndësinë e një qasjeje të re ndaj pronës shtetërore, përmes partneritetit me sektorin privat dhe përdorimit të modeleve evropiane të menaxhimit.
“Rezidencat e dikurshme të udhëheqësve të regjimit komunist kanë mbetur për dekada në një gjendje të paqartë, por sot po i kthejmë në funksione publike me interes kombëtar – si qendra mikpritjeje, kultura dhe turizmi,” u shpreh Kryeministri.
Rama përmendi shembuj konkretë të suksesshëm, si transformimi i dy rezidencave në Tiranë: njëra e kthyer në shtëpi pritjeje për personalitete të huaja dhe tjetra në qendër rezidenciale për artistë ndërkombëtarë në bashkëpunim me fondacionin francez Art Explora.
“Kjo qasje e re vendos shtetin në rolin e një partneri aktiv dhe të përgjegjshëm, duke e bërë një aktor në zhvillimin ekonomik dhe kulturor përmes vënies në përdorim të aseteve publike,” theksoi Rama, duke nënvizuar se ky model i ri ndërveprimi me sipërmarrjen po jep rezultate konkrete.
Ai vlerësoi përfshirjen e studiove prestigjioze ndërkombëtare në konkursin për rijetëzimin e Vilës në Vlorë dhe asaj në Velipojë, dhe falënderoi jurinë ndërkombëtare për mbështetjen profesionale në përzgjedhjen e projekteve.
“Po ndërtojmë një infrastrukturë të re financiare dhe funksionale për shtetin, të bazuar në përvoja të suksesshme nga Italia e Spanja, ku asete të ngjashme janë kthyer në burime të ardhurash dhe motorr zhvillimi për komunitetin,” përfundoi Kryeministri./L.F-dritare.net
