Ndahet nga jeta ikona e televizionit italian, Emilio Fede
E Martë 2 Shtator 2025, 19:07
Dritare.net
Emilio Fede, një nga figurat më të njohura të gazetarisë televizive italiane, ka ndërruar jetë sot në moshën 94-vjeçare. Ai u nda nga jeta në Residenzën San Felice në Segrate, afër Milanos, ku ishte i shtruar prej disa muajsh. Lajmin e ka konfirmuar e bija e tij, Sveva, e cila ishte pranë tij deri në momentin e fundit.
Fede lindi më 24 qershor 1931 në Barcellona Pozzo di Gotto, në provincën e Mesinës. Karrierën e tij e nisi në RAI, ku u bë një nga fytyrat më të njohura të lajmeve televizive italiane. Ai drejtoi TG1 nga 1981 deri në 1982, Studio Aperto nga 1991 deri në 1992, dhe TG4 nga 1992 deri në 2012. Gjatë drejtimit të TG4, ai u bë një mbështetës i flaktë i Silvio Berlusconit, duke u akuzuar shpesh për një mbulim të njëanshëm të ngjarjeve.
Në vitin 2019, Fede u dënua me katër vjet e shtatë muaj burg për favorizimin e prostitucionit në kuadër të çështjes “Ruby-bis”, lidhur me ngjarjet e njohura si “bunga bunga” të Berlusconit. Ai e ka mohuar gjithmonë akuzën dhe ka shërbyer dënimin e tij në arrest shtëpie dhe më pas në shërbim komunitar.
Funerali i tij do të zhvillohet të enjten, më 4 shtator 2025, në Kishën Dio Padre në Milano 2, Segrate./K.C/dritare.net
