Kush është Ilir Proda, i propozuar për drejtor të Policisë së Shtetit!
E Hënë 30 Shtator 2024, 15:03
Dritare.net
Ministri i Brendshëm Ervin Hoxha i ka propozuar kryeministrit Edi Rama si kandidat fitues të garës për Drejtorin e Policisë së Shtetit, Ilir Prodën. Ilir Proda është drejtor i Policisë së Qarkut Elbasan.
Kujtojmë se Ilir Prodës pak ditë më parë iu mor telefoni për verifikim edhe nga SPAK-u, në lidhje me dosjen e grupit "Çopja" në Elbasan, por që duket se ka rezultuar i pastër nga verifikimet e nevojshme.
Kush është Ilir Proda?
Karriera e tij nga oficer i thjeshtë, deri në detyrat e larta si Shef i Komisariatit nr. 2 në Tiranë përgjatë vitit 2014, ku u denoncua edhe për një incident i denoncuar nga një vajzë 19-vjeçare për dhunë, por që SHÇBA nga hetimet e nxori të pafajshëm, deri tek posti i kryepolicit të Elbasanit dhe tani i propozuar si drejtor i Përgjithshëm i Policisë së Shtetit.
Pas mbarimit të Akademisë së Sigurisë në vitin 2005, punoi si oficer në Komisariatet nr. 3 dhe 4 deri më 2012, për të kaluar më pas në Policinë e Shtetit për një vit dhe më tej si shef i Komisariatit nr. 2 në Tiranë.
Pas incidentit të vitit 2014, zhvendoset në Bulqizë për dy vite shef Komisariati dhe më pas në Drejtorinë e Përgjithshme, te sektorët e Antidrogës dhe Antikrimit për tre vite.
Më 2019 emërohet zv/drejtor në Korçë dhe më 2021 me të njëjtën detyrë në Elbasan, ku më pas emërohet edhe drejtor më 2023, post që e mban aktualisht.
Karriera e Ilir Prodës:
–2002-2005- Akademia e Policisë
-Gusht 2005- Nëntor 2011, Komisariati Nr.3 Tiranë
-Nëntor 2011-Mars 2012, Komisariati Nr.4 Tiranë
-Mars 2012- Qershor 2013, Drejtoria e Përgjithshme e Policisë së Shtetit, seksioni kundër krimeve ndaj jetës dhe lirisë së personit
-Qershor 2013- Tetor 2013, në Policinë e Lezhës
-Tetor 2013- Dhjetor 2014, Shef Komisariati Nr.2 Tiranë
-Dhjetor 2014 - Shkurt 2016, Shef Komisariati Bulqizë
-Shkurt 2016 - Maj 2017, Seksioni për hetimin e narkotikëve në Drejtorinë e Përgjithshme të Policisë së Shtetit
-Maj 2017 - Korrik 2019, Drejtoria e Përgjithshme, Njësia për hetimin e krimeve kundër personit dhe pasurisë
-Korrik 2019-Tetor 2021, Zv/Drejtor për hetimin e krimit në Korçë
-Tetor 2021-Mars 2023, Zv/Drejtor për hetimin e krimeve në Elbasan
-Mars 2023 dhe në vijim, Drejtor i Drejtorisë Vendore i Policisë së Elbasanit./K.C/dritare.net
