Hapen zyrtarisht Lojërat Olimpike Dimërore Milano–Cortina me një ceremoni madhështore
E Shtunë 7 Shkurt 2026, 09:09
Dritare.net
Lojërat Olimpike Dimërore Milano–Cortina kanë nisur zyrtarisht pas një ceremonie hapëse spektakolare, e cila u zhvillua njëkohësisht në katër lokacione të ndryshme në Itali. Stadiumi legjendar San Siro në Milano ishte skena kryesore, ndërsa pjesë të ceremonisë u mbajtën gjithashtu në Cortina d’Ampezzo, Livigno dhe Predazzo.
Pavarësisht shqetësimeve fillestare për organizimin e një ceremonie të shpërndarë në disa qytete, eventi u realizua me sukses dhe pa probleme organizative. Dy pishtarë olimpikë u ndezën – një në Milano dhe një tjetër në Cortina – ndërsa tenori i famshëm italian Andrea Bocelli emocionoi publikun me interpretimin e tij të fuqishëm të “Nessun Dorma”.
Parada e sportistëve u mbyll me një moment entuziast, ku ekipi i Italisë u prezantua i fundit, duke u përshëndetur me brohoritje të fuqishme në të katër lokacionet.
Sportistët ukrainas morën një pritje veçanërisht të ngrohtë nga publiku, ashtu si edhe ekipi i Shteteve të Bashkuara. Megjithatë, pati reagime negative kur në ekran u shfaq zëvendëspresidenti amerikan JD Vance, si dhe fishkëllima për ekipet e Izraelit dhe Gjeorgjisë.
Para paradës së sportistëve, shfaqja artistike e drejtuar nga Marco Balich u ndërtua mbi konceptin e “armonia-s”, duke synuar bashkimin e territoreve, njerëzve dhe vlerave. Ceremonia përfshiu segmente kushtuar bukurisë italiane dhe fantazisë, si dhe një homazh për stilistin e famshëm Giorgio Armani, i cili u nda nga jeta në vitin 2025 në moshën 91-vjeçare. Këngëtarja amerikane Mariah Carey performoi këngën “Volare”, e veshur me një kostum të bardhë vezullues.
Presidenti i komitetit organizator, Giovanni Malagò, theksoi rëndësinë e bashkëpunimit dhe krenarinë kombëtare: “Jemi gati të shkruajmë sërish histori olimpike, të frymëzuar nga vlerat që na bashkojnë të gjithëve: përsosmëria, miqësia dhe respekti”.
Lojërat u shpallën zyrtarisht të hapura nga presidentja e Komitetit Olimpik Ndërkombëtar, Kirsty Coventry, e cila bëri histori si gruaja e parë që hap zyrtarisht një Olimpiadë. Në fjalimin e saj, ajo theksoi se fryma olimpike shkon përtej sportit dhe përfaqëson më të mirën e njerëzimit.
Ndërkohë që disa gara kanë nisur tashmë, pesë medaljet e para të arta të Lojërave do të ndahen të shtunën./L.F-dritare.net
