Gjykata rrëzon kallëzimin për shpifje ndaj Albana Vokshit. Reagon pala kallëzuese: Beteja ligjore vazhdon!
E Hënë 21 Korrik 2025, 19:07
Dritare.net
Gjykata e Posaçme e Shkallës së Parë për Korrupsionin dhe Krimin e Organizuar ka shpallur sot vendimin për padinë penale të ngritur ndaj deputetes së Partisë Demokratike, Albana Vokshi, e akuzuar për veprën penale të “shpifjes së kryer botërisht”.
Pala kallëzuese në këtë proces ishte znj. Vilma Nushi, e cila akuzonte znj. Vokshi për deklarata të pavërteta dhe denigruese, të bëra gjatë ushtrimit të detyrës së saj si kryetare e Komisionit Hetimor Parlamentar. Sipas padisë, deklaratat përbënin shpifje publike dhe dëmtim të reputacionit.
Gjykata, megjithatë, vendosi rrëzimin e padisë, duke vlerësuar se deklaratat ishin bërë në një kontekst politik dhe nuk përbënin vepër penale sipas ligjit.
Menjëherë pas vendimit, pala kallëzuese, znj. Vilma Nushi, dha kete deklaratë per mediat:
“Referuar vendimit të sotëm të Gjykatës së Posaçme të Shkallës së Parë për Korrupsionin dhe Krimin e Organizuar, si palë kallëzuese, ne i qëndrojmë akuzave të bëra ndaj të kallëzuarës Albana Vokshi për veprën penale ‘Shpifje e kryer botërisht’.
Kemi bindjen se kallëzimi ynë është mbështetur në fakte dhe prova konkrete. Albana Vokshi, në funksionin e kryetares së Komisionit Hetimor, kishte në dispozicion informacionin dhe të gjitha dokumentet e nevojshme për të mos dezinformuar dhe për të mos shpifur.
Theksojmë se gjatë procesit, e kallëzuara dhe mbrojtja e saj e cilësuan faktin se deklaratat e bëra gjatë Komisionit Hetimor kanë pasur kontekst politik, duke shmangur kështu përgjegjësinë që lind nga deklarimet e pavërteta dhe shpifjet.
Ne i qëndrojmë pretendimeve tona dhe sapo të kemi vendimin e arsyetuar të Gjykatës, do të ndjekim të gjitha procedurat e mëtejshme ligjore.”
Ky reagim lë të kuptohet se çështja nuk është mbyllur dhe do të vijojë në instancat më të larta të drejtësisë.
Përplasja mes Vilma Nushit dhe Albana Vokshit, në SPAK dhe Gjykatën e Posaçme
Përplasja mes biznesmenes Vilma Nushi dhe deputetes së Partisë Demokratike, Albana Vokshi, është kthyer tashmë në një betejë të dyanshme ligjore, që zhvillohet paralelisht në SPAK dhe në Gjykatën e Posaçme për Korrupsionin dhe Krimin e Organizuar.
Pse Vilma Nushi paditi Albana Vokshin për shpifje?
Në qendër të konfliktit qëndron një seri deklaratash të bëra nga Albana Vokshi gjatë kohës që kryesonte Komisionin Hetimor Parlamentar për koncesionet në shëndetësi. Në një nga seancat e komisionit dhe në daljet publike, Vokshi akuzoi znj. Vilma Nushi – si pronare e kompanisë që ka fituar koncesionin për sterilizimin në spitale – për afera korruptive, përfitime të padrejta nga buxheti i shtetit dhe për lidhje të dyshimta me figura politike.
Sipas znj. Nushi, këto deklarata janë shpifje të qëllimshme dhe të rënda, të bëra publikisht dhe pa asnjë bazë faktike, në një kohë kur deputetja kishte në dorë të gjitha dokumentet zyrtare që vërtetonin ligjshmërinë e kontratës dhe mungesën e ndonjë shkeljeje. Për këtë arsye, ajo vendosi ta padisë Albana Vokshin për veprën penale “Shpifje e kryer botërisht”, duke e çuar çështjen në Gjykatën e Posaçme.
Avokatet e zonjes Nushi deklaruan se ky nuk është thjesht një konflikt politik, por një dëm i drejtpërdrejtë ndaj integritetit personal dhe reputacionit të një sipërmarrëseje që ka vepruar brenda ligjit. “Në një shtet ligjor, shpifja publike duhet të ketë pasoja”, – është thelbi i qëndrimit të tyre
Pse Albana Vokshi kallëzoi Vilma Nushin në SPAK?
Nga ana tjetër, Albana Vokshi ka depozituar një kallëzim penal në SPAK kundër Vilma Nushit dhe ndaj ish-zyrtarëve të Ministrisë së Shëndetësisë, duke i akuzuar për korrupsion dhe shpërdorim të fondeve publike përmes kontratës së sterilizimit.
Sipas kallëzimit të Vokshit, koncesioni i sterilizimit është një nga marrëveshjet më të dëmshme për buxhetin e shtetit, që ka kushtuar miliona euro më shumë sesa një shërbim i realizuar nga vetë spitalet publike. Ajo argumenton se ky koncesion është shembull tipik i një “marrëveshjeje të paracaktuar”, ku përfituesi ka qenë i njohur që në fillim dhe se është ndërtuar për të favorizuar në mënyrë të padrejtë kompaninë e znj. Nushi.
Kallëzimi në SPAK synon të nxisë hetime të plota për procedurat e dhënies së koncesionit dhe për çdo shkelje që mund të implikojë korrupsion aktiv apo pasiv të zyrtarëve dhe përfituesve.
Përballje në dy fronte: Gjykata e Posaçme dhe SPAK
Të dyja çështjet janë aktualisht në proces:
• Gjykata e Posaçme ka rrëzuar sot padinë e znj. Nushi ndaj znj. Vokshi për shpifje, me argumentin se deklaratat janë bërë në kontekst politik dhe parlamentar. Pala kallëzuese ka paralajmëruar apelim.
• SPAK vijon hetimet mbi kallëzimin penal të Vokshit për koncesionin e sterilizimit, por ende nuk ka dhënë asnjë vendim publik mbi ecurinë e çështjes.
Ndërkohë, kjo përplasje mbetet një nga rastet më të theksuara ku politika, biznesi dhe drejtësia përplasen në një konflikt të ndërlikuar, që mund të ketë pasoja të gjera për mënyrën si trajtohen akuzat publike dhe përgjegjësia individuale në Shqipëri.
Asgjë nuk ka mbaruar. Sot ishte vetëm një episod i kësaj përplasjeje publike që do të kthehet në një precedent juridik për raste të ngjashme, kur politika sulmon biznesin dhe mbrohen me imunitet./dritare.net
