GJKKO pushon padinë për shpifje të juristit Romeo Kara ndaj Monika Kryemadhit
E Enjte 12 Qershor 2025, 17:05
Dritare.net
Gjykata e Posaçme kundër Korrupsionit dhe Krimit të Organizuar (GJKKO) ka vendosur të pushojë çështjen për shpifje që juristi Romeo Kara kishte ngritur ndaj deputetes së Partisë së Lirisë, Monika Kryemadhi.
Sipas vendimit të dhënë nga trupa gjykuese, padia për shpifje nuk përmbushte kriteret ligjore për të vijuar më tej në proces gjyqësor, duke e cilësuar si të pabazuar.
Romeo Kara, një jurist dhe komentues i njohur për qëndrimet e tij kritike ndaj ish-drejtuesve të LSI-së (sot Partia e Lirisë), e kishte akuzuar Kryemadhin për shpifje në disa deklarata publike. Ai pretendonte se ajo kishte cënuar figurën dhe integritetin e tij përmes akuzave të pavërteta.
Nga ana tjetër, Kryemadhi kishte mohuar çdo shpifje dhe i kishte konsideruar deklaratat e saj si pjesë e qëndrimeve politike dhe të së drejtës për lirinë e shprehjes.
Vendimi i GJKKO-së është përfundimtar për këtë fazë të procesit, duke e mbyllur përkohësisht kapitullin gjyqësor mes dy palëve. Deri tani, nuk ka një reagim zyrtar nga asnjëra palë pas shpalljes së vendimit./K.C/dritare.net
