Ministri i Ekonomisë, Kulturës dhe Inovacionit, Blendi Gonxhja, i ftuar në emisionin Dekalog nga Roland Qafoku në DritareTV foli për marrëdhënien me kryeministrin Edi Rama, kohën kur të dy u futën në politikë, grevën e shkurtit 1991 dhe qeverisjen e Ramës këto 12 vjet.
Roland Qafoku: Ju keni qenë një nga bashkëpunëtorët më të afërt të zotit Rama, edhe si ministër, mik në rininë tuaj të hershme, por e keni pasur edhe profesor. Në bilancin politik këto 36 vjet, Rama ka fituar një betejë personale me dinozaurët e politikës shqiptare, Fatos Nanon dhe Sali Berishën. Tri mandate, 12 vjet kryeministër, ka gjasë që të marrë një mandat tjetër, ka qenë 11 vjet kryetar i Bashkisë së Tiranës, 2 vjet ministër i Kulturës dhe vetëm një vit kryetar opozitë. Asnjë politikan tjetër nuk e ka arritur këtë gjë. E kishit parashikuar që ky Rama që në vitin 1990 ishte kundër rrymës do ia kalonte të gjithëve?
Blendi Gonxhja: Nuk mund ta parashikoja, por e kam ndiere që atëherë. Ka pasur një moment kur ai u kthye nga një udhëtim familjar nga Greqia, në Tiranë edhe si natyrë impulsive që ishte, i drejtpërdrejtë, pati një debat të ashpër me Gramoz Pashkon dhe Sali Berishën. Ne nuk mund të lejonim të ndiqnim një mendësi si Berisha, por kishim dhe përgjegjësi që mos e linim vendin që të shkonte në drejtimin e mendësive të Saliut, apo të tjerëve si ai. Kështu realizuam Refleksionet në Akademinë Arteve, hapëm debatin për njerëz të tjerë, filluan të dalin të përndjekurit nga burgjet. Pastaj bëmë kërkesat për grevat e shkurtit 1991-shit. Ne ishim më kokëfortë në disa prej kërkesave, por meraku kryesor ishte; “Jo nën hijen e diktatorit Enver Hoxha dhe në asnjë mënyre në duart e ish-sekretarëve të Partisë së Punës, si Sali Berisha.” Të njëjtin merak si tani, ka pasur Rama atëherë. Të mos e lërë Shqipërinë në duart e ish-sekretarëve të partisë. Ka qenë një personazh që ka dashur të luftojë ballazi me mendësinë e vjetër. Ne kemi humbur shumë kohë duke u zënë me njëri-tjetrin, në dy pragluftërash civile, kemi humbur shumë kohë për të realizuar projektin e Shqipërisë që vjen, Shqipërisë evropiane. Unë e njoh mirë vullnetin që ka Rama, problemet që ka kaluar, e di që ka pasur një moment kur Shqipëria mund të shkonte në drejtimin e gabuar, edhe e di se ku do të shkojë me të në drejtim. Ne kemi nevojë për një udhëheqje të kësaj cilësie, për këtë vizion, kemi nevojë për këtë prestigj që Shqipëria ka marrë ndërkombëtarisht që natyrisht është falë personalitetit dhe karizmës së kryeministrit. Rama është nga ata njerëz që ka lënë gjumë në histori, gjurmë për mirë. Rama është personi që shkallmon kalçifikimin e partisë, duke futur në listat e mbyllura njerëz që ndoshta janë të panjohur, sepse nuk ka mënyrë më të mirë për të furnizuar partinë me gjak të ri, me njerëz të rinj, me komunitete, me përfaqësime të reja. Vetëm ai mund ta bënte këtë që po ndodh, brenda Partisë Socialiste, që do të drejtojë Shqipërinë drejt Evropës./K.C/dritare.net
