Shqipëria përkrah shqiptarët në Luginë dhe Sanxhak
E Premte 4 Prill 2025, 12:12
Dritare.net
Ambasada e Republikës së Shqipërisë në Beograd ka miratuar mbështetjen financiare për tri projekte të Këshillit Kombëtar Shqiptar (KKSH), në kuadër të përkrahjes institucionale për vitin 2025.
Lajmin e ka bërë të ditur Kryetari i KKSH-së, Enkel Rexhepi, i cili ka falënderuar Ministrinë për Evropën dhe Punët e Jashtme të Shqipërisë dhe Ambasadën shqiptare në Beograd për angazhimin e tyre konkret dhe të qëndrueshëm në mbështetje të shqiptarëve në jug të Serbisë.
Tri projektet që do të financohen janë:
-Kursi i gjuhës shqipe për shqiptarët në Sanxhak
-Festivali “Stand-UP Komedi Fest – Lugina”
-Fushatë ndërgjegjësimi për përdorimin zyrtar të gjuhës shqipe në Luginën e Preshevës
“Kjo mbështetje nuk është vetëm simbolike – është një hap konkret drejt ruajtjes së gjuhës, kulturës dhe identitetit tonë kombëtar në këto hapësira”, tha Kryetari Rexhepi.
Kjo përkrahje vjen në një kohë kur shqiptarët në Luginë vazhdojnë të përballen me sfida në fushën e të drejtave gjuhësore, përfaqësimit institucional dhe afirmimit kulturor.
“Më shumë Shqipëri dhe Kosovë në Luginë – më shumë zë për ne shqiptarët jashtë kufirit!” – përfundon njoftimi i KKSH-së./dritare.net
