Ambasada Amerikane paralajmëron qytetarët për protestën e sotme të opozitës në Tiranë
E Shtunë 24 Janar 2026, 13:01
Dritare.net
Ambasada Amerikane paralajmëron qytetarët për protestën e sotme të opozitës në Tiranë
Ambasada e Shteteve të Bashkuara të Amerikës në Tiranë ka publikuar një paralajmërim sigurie për qytetarët amerikanë lidhur me protestën e sotme të opozitës, e cila pritet të zhvillohet pasditen e kësaj të shtune në kryeqytet.
Sipas njoftimit zyrtar, protesta do të nisë në orën 17:00 në Bulevardin “Dëshmorët e Kombit”, midis Sheshit Skënderbej dhe Sheshit Nënë Tereza, pranë godinës së Kryeministrisë. Ambasada këshillon qytetarët amerikanë që të shmangin demonstratën dhe zonat përreth saj, për shkak të rrezikut të mundshëm që situata të përshkallëzohet.
Në njoftim theksohet se, ndonëse protestat dhe tubimet e mëdha shpesh fillojnë në mënyrë paqësore, situata mund të ndryshojë shpejt. Për këtë arsye, personelit të Ambasadës Amerikane i është kërkuar të mos marrë pjesë në demonstratë dhe të ndjekë me vëmendje udhëzimet e autoriteteve lokale.
Policia e Shtetit Shqiptar ka njoftuar se protestuesit mund të bllokojnë kryqëzime në pjesë të ndryshme të Tiranës, ndërsa pritet prani e shtuar e forcave të policisë, mbyllje rrugësh dhe ndërprerje të trafikut në zonën e protestës dhe përreth saj.
Ambasada Amerikane u bën thirrje qytetarëve amerikanë që të qëndrojnë vigjilentë dhe të marrin masa për sigurinë personale, duke rekomanduar:
shmangien e demonstratës dhe zonave përreth
vëmendje të shtuar ndaj mjedisit përreth
kufizimin e shpërqendrimeve si përdorimi i telefonave apo kufjeve në publik
mbajtjen e një profili të ulët
pasjen e një plani emergjence ose strategjie daljeje
Ambasada gjithashtu këshillon monitorimin e mediave lokale për informacionet më të fundit dhe ndjekjen e udhëzimeve të autoriteteve të rendit.
Qytetarët amerikanë inkurajohen të regjistrohen në Programin e Regjistrimit të Udhëtarëve të Mençur (STEP) për të marrë përditësime mbi sigurinë dhe njoftime emergjente./L.F-dritare.net
