Alban Beltoja: Defibrilatori shpëton jetë, në Itali është kudo!
E Diel 31 Gusht 2025, 18:06
Dritare.net
Mjeku anestezist në Milano, Alban Beltoja, ka folur ne Dritare Tv për rëndësinë jetike të defibrilatorit dhe për mënyrën si përdoret ky aparat që shpëton jetë.
“Defibrilatori është një pajisje që në mënyrë automatike analizon aktivitetin e zemrës dhe udhëzon hap pas hapi çfarë duhet të bësh. Në shumicën e rasteve kur një njeri bie në tokë pa ndjenja, shkaku është aritmia e zemrës, dhe ndërhyrja e vetme vendimtare është defibrilimi. Goditja elektrike kthen ritmin kaotik të zemrës në normalitet dhe i rikthen funksionin jetësor”, – shpjegon Beltoja.
Ku ndodhet defibrilatori në Itali
Në Itali, defibrilatorët janë të shpërndarë kudo: në rrugë, shkolla, supermarkete, palestra, qendra tregtare, lokale. “Nuk ka vend ku ka njerëz e të mos ketë defibrilator”, thotë mjeku shqiptar.
Kush e përdor
Pajisja nuk është vetëm për mjekët. Çdo qytetar i zakonshëm mund ta përdorë, sepse aparati të udhëzon me mesazhe zanore dhe vizuale. “Në Itali, jo vetëm mjekët, por edhe mësuesit, sportistët, gazetarët, ndjekin kurse BLS (Basic Life Support). Fëmijët nuk pranohen në punë verore në pishina nëse nuk kanë bërë kursin e ndihmës së parë”, shton Beltoja.
Si përdoret
Nëse një njeri bie papritur në tokë dhe nuk merr frymë:
1. Kontrollohet pulsi për 10 sekonda.
2. Nëse nuk ka aktivitet kardiak, thirret urgjenca dhe nis masazhi kardiak.
3. Nëse ka defibrilator afër, vendosen elektrodët sipas udhëzimeve të pajisjes dhe aparati vetë vendos nëse duhet dhënë goditja elektrike.
4. Masazhi kardiak vazhdon deri sa zemra rifillon ritmin ose mbërrin ambulanca.
“Jo të gjithë shpëtojnë, edhe në spital mund të humbësh jetën nga një arrest kardiak, por shanset rriten jashtëzakonisht nëse ndërhyrja bëhet brenda minutave të para”, – thekson Beltoja.
Mësimi për Shqipërinë
Në fund, mjeku shqiptar në Milano thekson se problemi kryesor në Shqipëri nuk është mungesa e profesionistëve në urgjencë, por mungesa e edukimit të qytetarëve për ndihmën e parë dhe shpërndarja e defibrilatorëve publikë.
“Duhet të mësojmë si të shpëtojmë jetën, në shkolla, në kurse, në rrugë. Kjo është A-ja e çdo shoqërie që kujdeset për qytetarët e saj”, përfundon Beltoja./dritare.net
