Agron Ylli: Doktor Geri, shembull për mjekësinë shqiptare!
E Hënë 14 Mars 2022, 10:10
Dritare.net
Dritare TV realizoi një dokumentar që i kushtohet mjekut endokrinolog Gerond Husi, i cili dha jetën në krye të detyrës pas infektimit nga Covid-19. Agron Ylli, Shef i Shërbimit të Endokrinologjisë në QSUT, e kujton doktor Gerin, si njeriun e mrekullueshëm dhe profesionist të shkëlqyer. Për profesor Yllin, doktor Geri ishte një shembull për mjekësinë shqiptare.
“Doktor Gerin do ta kujtojmë si një profesionist por gjithashtu si një pedagog shumë të mirë. Ditën që studentët do të bënin provimin e endokrinologjisë, të gjithë kishin vendosur nga një kordele të zezë. Ata kërkuan leje, për t’i bërë një homazh doktor Gerit. Ishte një pedagog që kishte hyrë në shpirtin e studentëve.
Ishte pjesë e një ekipi që e ndjen mungesën e doktor Gerit. Vitet që vijnë gjithmonë do ta mbajnë pjesë të kujtimeve tona. Jo vetëm ne, por e gjithë mjekësia shqiptare duhet të krenohet me njerëz si Geri, që i shërbeu popullit shqiptar me ndershmëri dhe profesionalizëm.
Unë e ndoqa nga afër kur Geri u infektua me Covid-19. Nuk e mendonim që Geri do të largohej kaq shpejt. Ai ishte gjithmonë pozitiv dhe kërkonte ta mposhte këtë sëmundje. Por rrethana të ndryshme bënë që kjo sëmundje ta mposhte. Por unë insistoj që figura e doktor Gerond Husit, duhet të na shërbejë të gjithëve, si shembull frymëzimi brezave të ardhshëm. Geri ishte human, mjek i devotshëm, profesionist shumë i mirë, pedagog dhe familjar i jashtëzakonshëm.
Ne duam që Ergi, të zëvendësojë doktor Gerin, me të gjitha virtytet që ka patur i ati.
Artistët duartrokiten nga publiku dhe marrin kënaqësi, ndërsa mjeku duartrokitjet i merr më vonë, kur ai është larguar nga profesioni!”, u shpreh doktor Agron Ylli./L.F-dritare.net
