LVV-LDK, vijojnë përplasjet për marrëveshjen politike
Sunday 9 August 2026, 13:01
Dritare.net
Pavarësisht përfundimit të bisedimeve pa marrëveshje, përplasjet mes Lëvizjes Vetëvendosje dhe Lidhjes Demokratike të Kosovës po vijojnë në distancë, me palët që po mbrojnë publikisht qëndrimet dhe ofertat e tyre për ndarjen e institucioneve.
Deputeti i LVV-së, Ilir Kërçeli, ka përsëritur ofertën e subjektit të tij për LDK-në dhe PDK-në, duke e cilësuar si kompromis propozimin për një president konsensual dhe ndarjen e pozitave të larta institucionale.
Nga ana tjetër, deputeti i LDK-së, Arben Gashi, ka kundërshtuar pretendimet se LDK-ja po kërkon më shumë se sa i takon. Ai ka argumentuar se, bazuar në numrin e deputetëve, ndarja e pushtetit duhet të jetë proporcionale mes dy forcave politike.
Gashi ka theksuar gjithashtu se problemi mes LVV-së dhe LDK-së nuk lidhet vetëm me postin e presidentit, por edhe me mungesën e mirëbesimit dhe dallimet për programin qeverisës dhe politikat kryesore.
Ndërkohë, PDK-ja dhe Aleanca kanë refuzuar ftesat për takim nga Albin Kurti për diskutimin e konstituimit të institucioneve dhe çështjes së presidentit.
LDK-ja i ka pranuar ftesat për takim, por pas takimit të fundit, kryetari i saj ka deklaruar se palët mbeten ende larg një marrëveshjeje.
