Na ndiqni edhe në

Shkrimet e Dritanit

Dritan Leli intervistë për revistën italiane: Ejani me pushime, Vlora ju mirëpret!

Dritan Leli intervistë për revistën italiane: Ejani me pushime,

Në intervistë për “Il grande Salento”, kryebashkiaku i Vlorës, Dritan Leli gjatë edicionit të 6-të të Menaxhimit të Biznesit të Turizmit, që po zhvillohet në Leçe të Italisë fton të gjithë të shkojnë në Vlorë për pushime duke treguar gjithçka për zonën.

Intervista

Kryebashkiaku Dritan Leli, si do e paraqisnit Vlorën, këtu në anën tjetër të Adriatikut?

Vlora është një qytet që ka ndryshuar thellësisht në pesë vitet e fundit. Ne kemi bërë shumë investime në infrastrukturë që kanë ndryshuar rrënjësisht pamjen e qytetit tonë. Ne kemi krijuar një shëtitore të bukur, plot me palma, me një shëtitore prej më shumë se katër kilometrash. Njerëzit mund të ecin pranë detit, të ndalojnë për t’u freskuar në restorante dhe bare moderne, të vizitojnë shumë vende të tjera të bukura që janë afër. Është një qytet që ka ndryshuar me shpejtësi vitet e fundit, por ka ende një ofertë të fortë për t’u zhvilluar, sepse ekzistojnë mundësitë, ekziston tradita dhe natyra ndihmon në një mënyrë fantastike. Ka të gjitha potencialet për t’u bërë një destinacion turistik.

Ndër pikat e forta ju keni një bregdet të mrekullueshëm me një det të bukur. Çfarë jeni duke bërë për ta përmirësuar atë?

Ne ndërtuam qytetin tonë me idenë për të patur një marinë për të gjithë Shqipërinë dhe për vendet e tjera të Adriatikut, në veçanti për Italinë dhe Puglian, duke pasur parasysh afërsinë tonë. Kjo është arsyeja pse ne jemi këtu. Kemi ardhur në Itali për të paraqitur ofertën tonë turistike, për ta prezantuar qytetin tonë tek italianët, të cilët vitet e fundit janë gjithnjë e më prezentë në sheshet tona. Dhe do të doja të dërgoja një ftesë, për të gjithë ata që po mendojnë të organizojnë pushimet, të vijnë në Vlorë, edhe sepse është një vend kaq afër Italisë, vetëm katër deri në pesë orë nga Brindisi, për të mbërritur në qytetin tonë që është një vend për t’u zbuluar.

Duke folur për transportin, distanca midis Salentos dhe Vlorës mund të bëhet edhe më shpejt…

Ne po punojmë shumë me kryetarin e bashkisë së Brindizit, gjithashtu me Autoritetin Portual të Puglias, për të gjetur zgjidhje më të mira për transportin dhe t’i bëjmë lidhjet më efikase. Ne vendosëm një traget tjetër në rrugën Vlorë-Brindisi, por duhet të zhvillojmë më tej lidhjet, sepse ka mundësi për të përmirësuar transportin për të sjellë më shumë njerëz. Ne po organizojmë gjithashtu një tender të madh ndërkombëtar për ndërtimin e një aeroporti të Vlorës, me një investim të madh për të zhvilluar përfundimisht të ardhmen turistike të qytetit tonë në një mënyrë të përshtatshme.

Distanca me Otranton është më e afërt, a mendoni për ura lidhëse më të shpejta?

Sigurisht, mund të mendojmë edhe për lidhje të shpejta me Otranton, veçanërisht në verë, kur trafiku është më intensiv, sepse ka kaq shumë njerëz në Itali që duan të lëvizin, për të ardhur në anën tjetër të Adriatikut. Ne mund të bëjmë gjithçka, por gjëja më e rëndësishme është promovimi, reklamimi, duke e bërë të qartë se ka një vend mikpritës përpara nesh, i cili i pranon njerëzit më mirë. Ne i kushtojmë vëmendje të veçantë publikut italian, udhëtarëve, sepse mendoj se italianët janë një popull që udhëton shumë. Dhe nëse kërkesa rritet, investimet për të përmirësuar pranueshmërinë gjithashtu mund të rriten.

A ka akoma ndonjë problem sigurie në Vlorë?

Në këtë drejtim, unë do të doja të tregoja një histori të bukur me një gjeneral të vjetër, i cili vinte shpesh në Shqipëri dhe bënte udhëtime turistike me anije me vela. Ai, një burrë 75 vjeç, mbaj mend, që qëndronte çdo verë në Orikum, dhe më tha: “Orikumi është 25 kilometra nga Vlora, edhe pse dal në 10 të natës, marr biçikletën time për të shkuar pesë kilometra për të blerë diçka, nuk më ndodh asgjë. Këtë nuk mund ta garantoj në periferi të Romës ose Milanos ose në ndonjë vend tjetër në Itali”. Shqipëria është një vend paqësor.

Po shërbimet që ofrohen si janë?

Shërbimet janë gjithashtu në zhvillim të madh. Gastronomia në qytetin e Vlorës është ndër më të mirat në Ballkan, në shumë restorante mund të shijoni kuzhinën tipike të qytetit tonë. Shërbimet e akomodimit gjithashtu po përmirësohen. Sigurisht që ato nuk janë akoma si ato të disa qyteteve italiane, si në Milano, për shembull. Ne po bëjmë hapa të vegjël, por të sigurt përpara./K.C/dritare.net