Gjobat, sulmet dhe deklaratat e forta: A po rrezikohet paqja globale?
E Hënë 8 Dhjetor 2025, 12:12
Dritare.net
Corriere della Sera
Elon Musk ka hapur një tjetër front kundër Bashkimit Europian, duke e krahasuar Brukselin me “Rajhun e Katërt” dhe duke shpërndarë një imazh provokues, pasi BE i ka vendosur një gjobë prej 120 milionë eurosh platformës X. Si reagim, ai ka fshirë edhe llogarinë zyrtare të reklamave të BE-së nga rrjeti i tij social dhe ka kërkuar hapur shpërbërjen e Unionit.
Ndërkohë, Donald Trump Jr. ka kritikuar mbështetjen amerikane për Ukrainën, duke deklaruar se opinioni publik në SHBA nuk dëshiron më të financojë luftën dhe se Ukraina, sipas tij, është më e korruptuar se Rusia. Ai nuk përjashtoi mundësinë që Donald Trump, nëse rikthehet në pushtet, të tërhiqet nga procesi i paqes.
Pavarësisht këtyre deklaratave, SHBA lë të hapur një dritare shprese për paqe, me të dërguarin special Keith Kellogg që thotë se një marrëveshje është shumë pranë, nëse zgjidhen çështjet e Donbassit dhe centralit të Zaporizhzhias. Nga ana tjetër, Moska mbetet skeptike.
Sot në Londër zhvillohet një takim i liderëve europianë me Zelenskyn, Macron, Starmer dhe Merz, ndërsa kryeministrja italiane Giorgia Meloni ka rikonfirmuar mbështetjen e Italisë për Ukrainën, përfshirë dërgimin e gjeneratorëve për infrastrukturën energjetike.
Në terren, Rusia vazhdon avancimin e ngadaltë, duke marrë disa zona të reja në Kharkiv dhe Donetsk. Aktualisht ajo kontrollon rreth 19.2% të territorit të Ukrainës, përfshirë Krimenë, por kërkesat e saj mbeten edhe më të mëdha. Popullsia ukrainase shprehet e vendosur të mos heqë dorë nga tokat e saj, pavarësisht lodhjes nga lufta./L.F-dritare.net
