Foto nga dasma e vitit/ Martohet djali i manjatit Ambani
E Premte 12 Korrik 2024, 21:09
Dritare.net
Këtë fundjavë zhvillohet dasma e vitit në Indi. Anand Ambani, 29 vjeç, po lidh martesën me partneren Radhika Merchant në Qendrën e Konventave Botërore Jio në pronësi të familjes në Mumbai.
Festimet katërditore të dasmës filluan me një ceremoni tradicionale hindu të premten, e ndjekur nga një pritje madhështore që do të zgjasë gjatë gjithë fundjavës. Lista e të ftuarve përfshin ish-kryeministrat britanikë Tony Blair dhe Boris Johnson, CEO i Saudi Aramco Amin Nasser, Adele, Lana Del Rey, Drake dhe David Beckham, sipas mediave lokale. Familja Ambani nuk e ka konfirmuar listën e të ftuarve.
Babai i dhëndrit, Mukesh Ambani është personi i nëntë më i pasur në botë me një pasuri prej 116 miliardë dollarësh, sipas Forbes. Ai është edhe njeriu më i pasur në Azi. Reliance Industries është një konglomerat i madh me të ardhura vjetore mbi 100 miliardë dollarë. Bizneset e saj përfshijnë energji, petrokimike, gaz natyror, shitje me pakicë, argëtim, telekomunikacion, media dhe tekstile. Djali i Ambani, Anand po mbikëqyr zgjerimin e grupit në burimet e rinovueshme dhe energjinë e gjelbër. Ai gjithashtu drejton një qendër shpëtimi kafshësh prej 3000 hektarësh në Jamnagar, shteti Gujarat, vendlindja e familjes.
Sipas Associates Press, familja Ambani zotëron, mes pasurive të tjera, një kompleks familjar 27-katësh në Mumbai me vlerë 1 miliard dollarë, tre helipada, një garazh me 160 makina dhe një kinema private.
Nusja, Radhika Merchant, 29 vjeçe, është vajza e manjatit farmaceutik Viren Merchant dhe është shefja e marketingut të kompanisë së tij, Encore Healthcare, sipas Vogue.
Në mars, ata organizuan një festë treditore me 1200 të ftuar, duke përfshirë ish-liderë botërorë, manjatë të teknologjisë dhe performancë nga Rihanna dhe Akon. Në këtë ngjarje morën pjesë edhe miliarderët e teknologjisë Mark Zuckerberg dhe Bill Gates./K.C/dritare.net
