Ermal Meta rikthehet në Sanremo me “Stella stellina”. Ja mesazhi i këngës!
E Enjte 26 Shkurt 2026, 18:06
Dritare.net
Këngëtari shqiptar Ermal Meta, i njohur në Itali dhe ndërkombëtarisht, rikthehet këtë vit në Festivalin e Sanremos. Pas fitores së vitit 2018 në duet me Fabrizio Moro me këngën “Non mi avete fatto niente” dhe renditjes së pestë në Eurovision, Meta sjell një këngë të re me mesazh të fuqishëm.
Me këngën “Stella stellina”, Meta i dedikon performancën një vogëlusheje të vrarë gjatë një sulmi në Gaza. Në vend të një balade intime, kënga ka ritëm të shpejtë dhe përzien tinguj latinë me influenca ballkanike, duke rikthyer rrënjët e artistit dhe një dimension popullor, pothuajse koral.
Pas energjisë tingullore fshihet një histori e dhimbshme: një vajzë palestineze pa emër, e evokuar përmes syve të një burri që mban në duar kukullën e saj.
Meta u ngjit në skenë me emrin “Amal”, një vajzë palestineze, të shkruar në jakën e këmishës së tij, dhe deklaroi se çdo natë do të ketë të shkruar në këmishë emrin e një fëmije palestinez.
“Protagonistja e ‘Stella stellina’ është një fëmijë pa emër, por ndoshta i ka të gjitha emrat. Aysha, Amal, Layla, Nour, Hind… ç’rëndësi ka? Ndoshta gjithçka, ndoshta asgjë. Fëmijë të askujt, fëmijë të të gjithëve,” shkroi Meta në rrjetet sociale pas performancës, duke theksuar mesazhin e këngës./K.C./dritare.net
