Zbulohet operacioni. Orët e fundit të Ali Khamenei
E Diel 1 Mars 2026, 10:10
Dritare.net
Shtetet e Bashkuara dhe Izraeli kanë zbuluar detaje pas skenave të sulmit që shkaktoi vdekjen e Ali Khamenei, Udhëheqësit Suprem të Republikës Islamike të Iranit. Mediat amerikane si New York Times dhe Wall Street Journal kanë rindërtuar skemat e këtij operacioni, i cili përfundoi me “eliminim i udhëheqësit” e hierarkisë së lartë iraniane dhe goditi një godinë kyçe të kontrolluar nga Khamenei.
Planifikimi dhe spiunazhi
Sipas raportimeve, inteligjenca amerikane e ndoqi Khamenei për muaj me radhë, duke regjistruar çdo lëvizje të tij dhe të takimeve të drejtuesve të lartë të gardës revolucionare. Khamenei, për arsye sigurie dhe shëndetësore, minimizonte dukshëm shfaqjet publike, duke besuar se ishte i mbrojtur në një kompleks të pajisur me sisteme sigurie dhe bllokime teknologjike.
Kur u siguruan provat e pranisë së tij në Beit E Rahbari, një qendër strategjike në Teheran, amerikanët i kaluan informacionet Izraelit, i cili ndërmori veprimet e mëtejshme. Ky shkëmbim informacioni është i ngjashëm me operacionin e vitit 2020 kundër komandantit Qasem Soleimani, kur rolet e SHBA dhe Izraelit ishin të kundërta nga sot.
Sulmi dhe shkatërrimi i kompleksit
F-16 izraelite u ngritën nga një bazë rreth orës 6 të mëngjesit, të pajisura me armë të lira nga distanca, dhe disa orë më pas nisi aksioni përfundimtar. Të paktën 30 shpërthime goditën kompleksin, duke shkatërruar pjesë të ndërtesës dhe duke vrarë shumicën e zyrtarëve të lartë që ndodheshin aty. Khamenei ishte në një pjesë nën tokë të kompleksit, por jo në bunkerin më të thellë, ndaj nuk pati mundësi shpëtimi.
Mes të tjerëve, ishin të pranishëm: ministri i Mbrojtjes Aziz Nasirzadeh, komandanti i Gardës Revolucionare Mohammad Pakpour, kreu i Shtabit të Përgjithshëm Abdolrahim Mousav, ish-adhminali dhe këshilltari Ali Shamkhani dhe drejtues të tjerë të lartë ushtarakë dhe të inteligjencës.
Roli i inteligjencës dhe teknologjisë
Sipas mediave, suksesin e operacionit e garantuan disa faktorë:
Përdorimi i informacionit të mbledhur nga inteligjenca amerikane dhe izraelite
Ndihma e spiunëve brenda sistemit iranian
Përdorimi i inteligjencës artificiale dhe teknologjisë moderne për monitorim dhe përzgjedhje të targetit
Koordinimi strategjik mes dy aleatëve, edhe pse në një fushë ku besimi është i kufizuar.
Kjo sfidë tregoi dobësitë e sistemit të mbrojtjes së Iranit, pavarësisht nga kontrolli i rreptë dhe aparati i shumëfishtë i sigurisë, duke krijuar precedentë për aksione të tjera strategjike në rajon.
Reagimet dhe pasojat
Autoritetet iraniane fillimisht pretenduan se Khamenei ishte i sigurt, ndërsa më pas thanë se ishin ndërprerë kontaktet, duke premtuar një fjalim për kombin. Realiteti ishte ndryshe: Udhëheqësi Suprem ishte vrarë, së bashku me një numër të konsiderueshëm zyrtarësh të lartë.
Sulmi vjen pas një serie ngjarjesh të ngjashme: eliminimi i udhëheqësve të Gardës Revolucionare, shkencëtarëve dhe figurave kyçe të aksit shiit, duke treguar një strategji të gjatë dhe të koordinuar të SHBA dhe Izraelit në rajon.
Rindërtimi i operacionit tregon një bashkëpunim të thellë mes inteligjencave dhe përdorimin e teknologjisë për të shfrytëzuar çdo dobësi të kundërshtarit. Vdekja e Khamenei shënon një moment kyç për Lindjen e Mesme, duke hapur një kapitull të ri pas dekadash kontrolli dhe represioni të regjimit iranian./L.F-dritare.net
