Rama takim kokë më kokë sot me Macron. Ja marrëveshjet që do të firmosen në Paris!
E Premte 12 Prill 2024, 08:08
Dritare.net
Kryeministri Edi Rama ka nisur ditën e djeshme një vizitë zyrtare dyditore në Francë me ftesë të presidentit Emmanuel Macron, ku do të zhvillojë një sërë takimesh për të promovuar klimën pozitive që ofron Shqipëria lidhur me investimet e huaja, dhe bashkëpunimin mes dy vendeve në fushën e teknologjisë dhe inovacionit. Sot në orën 8.30, Rama mbajti një mëngjes pune me Unionin e Sipërmarrësve të Francës MEDEF, nën drejtimin e z. Jean-Paul Agon, president i grupit L'Oréal dhe i komitetit Francë-Shqipëri në MEDEF, me pjesëmarrjen e 35 përfaqësuesve të kompanive prestigjoze franceze, si dhe të ftuar të tjerë nga bota e biznesit.
Gjatë takimit do të prezantohen disa nga fushat prioritare për investime në Shqipëri, me interes të ndërsjellë për të dy vendet dhe më pas kryeministri do të zhvillojë takime individuale me drejtues të sipërmarrjeve pjesëmarrëse. Më pas në orën 12.30, do të zhvillohet ceremonia zyrtare e mirëseardhjes dhe në orën 13.00, Rama do të mbërrijë në Pallatin Elysee, ku do të mikpritet nga presidenti Macronme të cilin do të mbajnë edhe një deklaratë për shtyp. Më pas, në praninë e kryeministrit Rama dhe Macron do të nënshkruhen disa marrëveshje ndërqeveritare dhe memorandume mirëkuptimi mes vendeve. Në orën 14.45, Rama dhe Macron do të zhvillojnë një takim kokë më kokë mes tyre.
Axhenda do të vijojë në orën 16.00 me vizitën dhe takimet në STATION F, inkubatori më i madh në botë i startup-eve dhe inovacionit, si dhe me mbledhjen inauguruese të Këshillit të Inovacionit Francë-Shqipëri –CIFA, ku do të marrë pjesë edhe sekretarja franceze e Shtetit për Industrinë Numerike, përfaqësues të ministrive franceze të Jashtme dhe të Ekonomisë, si edhe operatorë të ndryshëm franceze e shqiptarë në fushën e inovacionit.Së bashku me kryeministrin Rama pjesë e delegacionit qeveritar do të jenë ministrja e Arsimit Ogerta Manastirliu, ministrja e Turizmit Mirela Kumbaro, ministri i Ekonomisë, Kulturës dhe Inovacionit Blendi Gonxhe, ministri i Shtetit për Pushtetin Vendor Arbjan Mazniku, si dhe ministrja e Shtetit për Administratën Publike dhe Antikorrupsionin Adea Pirdeni./dritare.net
