Firence vishet kuq e zi! Diaspora mblidhet pranë Duomos
E Diel 30 Nëntor 2025, 09:09
Dritare.net
Në zemër të Firences, vetëm pak hapa larg madhështisë së Duomos, një atmosferë e ngrohtë kuqezi sfidoi mbrëmjen e ftohtë të nëntorit. Në Bibliotekën historike 'Delle Oblate', komuniteti shqiptar i Toskanës u mblodh për të festuar Ditën e Flamurit, duke dëshmuar se identiteti kombëtar jehon edhe përtej kufijve.
Ky aktivitet, i organizuar me kujdes nga rrjeti i grave profesioniste shqiptare në Firence, nuk ishte thjesht një festë protokollare, por një urë lidhëse mes brezave dhe një dëshmi e gjallë e integrimit të suksesshëm që nuk i harron rrënjët.
Ngjarja mblodhi së bashku fëmijë të lindur në Itali, prindër të dedikuar dhe miq italianë të dashuruar me kulturën shqiptare. Në qendër të vëmendjes ishin fëmijët e Diasporës, të cilët, edhe pse të rritur larg tokës së të parëve, recituan dhe folën rrjedhshëm gjuhën shqipe, duke emocionuar të pranishmit. Përmes një projekti të veçantë kulturor të titulluar 'Zuela', brezi i ri prezantoi histori frymëzuese të figurave femërore shqiptare që kanë lënë gjurmë në histori, duke treguar se krenaria kombëtare ushqehet përmes njohjes së historisë dhe modeleve të suksesit.
Festa shërbeu gjithashtu si një reflektim mbi sfidat e integrimit.
Organizatorët dhe pjesëmarrësit diskutuan mbi vështirësisë e fillimeve në një vend të huaj, paragjykimet dhe punën e palodhur që duhet për të arritur majat. Megjithatë, fryma e përgjithshme ishte ajo e optimizmit dhe krenarisë. Fëmijët, me pafajësinë dhe sinqeritetin e tyre, shprehën gëzimin që vendi i tyre i vogël, 'një pikë në hartë', arrin të prodhojë talente dhe histori që bëjnë jehonë botërore.
Ky takim në Firence ishte më shumë se një festë, ishte një premtim se gjuha dhe tradita shqiptare do të vazhdojnë të trashëgohen./Dritare.net
