Detajet nga homazhet për Shpat Kasapin. Kur do i jepet lamtumira e fundit!
E Shtunë 29 Nëntor 2025, 13:01
Dritare.net
Këngëtari i njohur shqiptar, Shpat Kasapi, i cili u nda papritur nga jeta në moshën 40-vjeçare, do të varroset nesër në qytetin e Tetovës. Ceremonia mortore do të mbahet paraditen e së dielës, duke ofruar mundësinë për të gjithë fansat, miqtë dhe kolegët e tij që t’i japin lamtumirën e fundit artistit.
Sipas njoftimit të familjes, homazhet do të zhvillohen në Pallatin e Kulturës në Tetovë, në orën 11:00.
Pas homazheve, procesioni do të niset drejt varrezave të qytetit, ku varrimi i Kasapit është caktuar të mbahet në orën 14:00.
Në njoftimin zyrtar familjar, Kasapi u përshkrua si “një zemër e bardhë dhe një shpirt i gëzuar”, i cili la pas një trashëgimi të pasur muzikore dhe një ndikim të ndjeshëm tek publiku shqiptar.
Shpat Kasapi ndërroi jetë të mërkurën pas një arresti kardiak./K.C/dritare.net
