'Gregu ishte në koma, nuk dihej nëse do kthehej apo jo!', Rama rrëfen bisedat me mjeken që trajtonte të birin!
E Shtunë 5 Prill 2025, 11:11
Dritare.net
Në intervistën me Kryepeshkopin Joan Pelushi në podcastin Flasim, Kryeministri Edi Rama ka ndarë një moment të vështirë nga jeta e tij, kur i biri kaloi një situatë shumë të rëndë shëndetësore. Ai ka rrëfyer ankthin që përjetoi kur djali i tij ishte në koma.
“Më rikthehet një ngjarje e jetuar me mjeken që kuronte tim bir, i cili kaloi një moment mjaft dramatik me një kancer, edhe faktikisht gjërat shkuan aq keq sa u fut në një koma mjekësore famaceutike, edhe nuk dihej a do të kthehej apo jo. Isha me mjeken ndërsa djali ishte në koma dhe i them “Po tani?” Më thotë “24 orët e para çdo lajm do të jetë një lajm i keq, urojmë që s’do kemi asnjë lajm”.
24 orët e para ishin tmerr, në çdo moment mund të ndodhë që të dalë dikush nga ajo zona e reanimacionit e të thotë… Kur i thashë “Si vazhdon?”, ajo ngriti kokën dhe bëri me dorë… I thashë ‘Çfarë po më tregon tavanin? Unë po flas me një shkencëtare, jo me një prift’.
Dhe më tha: Në këtë kat, (ishte kati i fëmijëve me kancer) unë kam parë gjëra që shkenca nuk m’i ka shpjeguar dot akoma.
Kishte një Kapelë spitali dhe ajo sillte njoftime që në x orë unë bashkë me ekipin do të lutemi për Gregun, ose edhe për fëmijë të tjerë. I thashë ‘Çfarë është kjo histori që shkoni e luteni në Kapelë, çfarë lidhje ka kjo me terapinë?”
Më tha, “E kemi të nevojshme, ndihemi shumë mirë kur e bëjmë, marrim energji”. Ishte qartësisht një njeri që besonte. Më thoshte “Quaje si të duash, unë di që ka mister dhe nga ajo zonë e misterit vijnë në këtë kat gjëra që nuk i parashikon dot, ose nuk i shpjegojmë dot më mbrapa”, tregoi Rama./E.P-dritare.net
