Majko në Selanik, radhë në Kapshtice dhe Kakavije

Pas vizitës se ministrit të emigracioni Pandeli Majko në Greqi, mijëra shqiptarë janë entuziazmuar dhe mendojnë të kthehen në atdhe për ndërtimin e rilindjes ose vazhdimin e pandërprerë të protestave deri në rrëzimin e qeverisë. Nuk kanë munguar as këngët dhe poezitë me këtë rast. Poeti dhe përkthyesi Arqile Garo, është një prej tyre. Ja çfarë shkruan ai:

NE SHQIPERI

Në atdhe doja të veja,

një gotë me raki të ktheja,

e të shtrihesha malluar ,

ndënë hijen e bekuar.

T’i hidhja ca ujë suratit

nga i ëmbli kroi i fshatit,

të ndizja televizorin,

e të dëgjoja doktorin.

Të zbrazja pjatën e paçës

nën britmat e Erion Braçes,

nën bëmat e Oso Kukës,

poezitë e Arben Dukës.

Të kujtoj shijen e kosit,

tangërllëkun e Fatosit,

të shijoj erën stanit,

buzëqeshjen e Nishanit.

Historinë e Doruntinës,

në version të Zhozefinës,

cicërima të bilbilit,

romane të Ismailit,

anektoda të Pëllumbit,

shijen e athët të plumbit,

të shoh vepra të Enverit,

nën krismat e maliherit.

Të këndoja kodrës, shpatit,

trimëritë e Lazaratit,

vuajtjet e Teme Sejkos

dhe lavdinë e Landi Bejkos.

Të bridhja fushës së Bulos,

me këngët e Petrit Lulos,

të kundroja brigjet, barin,

tok me Igli Kokalarin.

Tek pikojnë hojet e bletës,

karrjerën e Ilir Metës

të m’ i thonte zëri i gjelit

aventurat e Vangjelit.

Të ndjeja zhurmën e Lanës,

vrasjet në mes të Tiranës,

mendimet e Presidentit,

mençurinë e Parlamentit.

Histori të Ali Pashës,

deklarata të Lul Bashës,

vetingjet e Amerikës,

ndënë çizmen e Monikës.

Te kisha e Shën Prokopit,

t’i rrëfeja Bamir Topit,

çështjen e Sajmir Tahirit,

me hashashin e qafirit.

Të shfletoja buzë liqenit,

«dosjet» e Daut Gumenit,

t’ i falëm ikonostasit,

për lavdinë e Anastasit.

Ndënë hijen e Tomorit,

të kujtoj kohën e zborit,

tek hidhnim gunat mbi tela,

e na printe Spartak Ngjela!

Të prek erën, të shkel dhenë,

të kujtoj dhe Skënderbenë,

të bëj kryq, të marr avdes,

të shtrihem e të mos vdes.

Arqile Garo

Janninë, shkurt 2016

(Autori është poet & përkthyes. Poezia botohet me lejen e autorit. Hyrja në prozë është e portalit)