Gjykata e Apelit dënon me 2.4 vite burg prokurorin Haxhi Giu

Gjykata e Apelit për Krimet e Rënda ka lënë në fuqi vendimin e shkallës së parë, duke e dënuar Haxhi Giun me 2 vjet e 4 muaj. Gjykata e Krimeve të Rënda vendosi para disa javësh dënimin me 3 vjet e 6 muaj burg. Ish ­prokurori i Krujës u gjykua me gjykim të shkurtuar, ndaj dënimi i tij shkon në 2 vjet e 4 muaj. Atij gjithashtu iu hoq e drejta që për tre vjet të ushtrojnë funksion publik. Giu akuzohet për korrupsion pasiv. 1 vit e 4 muaj burg u dhanë nga gjykimi i shkurtuar edhe për Aleks Shporin.

Një nga provat kryesore të Prokurorisë së Krimeve të Rënda për Haxhi Giun mësohet se janë përgjimet telefonike. Regjistrimi i bisedave ka nisur për shtetasin Paulin Shpori, i arrestuar për trafik droge në vitin 2014.

Mësohet se kanë qenë thëniet e vëllait të Paulinit, Aleks Shporit ato që kanë zbuluar implikimin e prokurorit në çështjen penale. Vëllai gjatë bisedave i shpjegonte të arrestuarit përpjekjet që po bënte për t’i mundësuar lehtësimin e akuzës dhe të dënimit pas kapjes me drogë të Paulin Shporit. Pikërisht në këto biseda mësohet se janë përmendur takimet me prokurorin Haxhi Giu dhe më pas shuma që i është ofruar atij prej 29 mijë eurosh.