Trump paralajmëron Iranin për marrëveshjen bërthamore: Koha po mbaron
E Mërkurë 28 Janar 2026, 21:09
Dritare.net
Presidenti amerikan Donald Trump ka paralajmëruar Iranin se “koha po mbaron” për arritjen e një marrëveshjeje mbi programin e tij bërthamor, ndërsa Shtetet e Bashkuara po shtojnë praninë ushtarake në Gjirin Persik.
Trump deklaroi se një “armatë masive” detare amerikane, e udhëhequr nga aeroplanmbajtësja USS Abraham Lincoln, po lëviz me shpejtësi drejt rajonit, duke theksuar se forcat amerikane janë “gati, të gatshme dhe të afta” të veprojnë nëse është e nevojshme.
Në reagim, ministri i Jashtëm iranian, Abbas Araghchi, tha se forcat e armatosura të Iranit janë në gatishmëri të plotë dhe se do të përgjigjen “menjëherë dhe fuqishëm” ndaj çdo agresioni nga toka apo deti. Ai përsëriti se Irani nuk synon të zhvillojë armë bërthamore dhe se programi i tij ka qëllime paqësore.
Paralajmërimi i Trump vjen mes tensioneve të shtuara pas protestave masive në Iran dhe akuzave për represion të dhunshëm. Organizata Human Rights Activists News Agency (HRANA) raporton mbi 6,300 të vrarë që nga fundi i dhjetorit, ndërsa grupe të tjera të të drejtave të njeriut paralajmërojnë se numri real mund të jetë shumë më i lartë.
Trump u bëri thirrje autoriteteve iraniane të ulen në tryezën e bisedimeve për një marrëveshje “të drejtë dhe të barabartë”, duke theksuar se SHBA-ja nuk do të lejojë Iranin të zotërojë armë bërthamore. Ndërkohë, Teherani ka bërë të ditur se aktualisht nuk ka negociata të drejtpërdrejta me Uashingtonin, pavarësisht shkëmbimeve të mesazheve./K.C/dritare.net
