Netanyahu planifikon pushtimin e plotë të Gazës. Ja çfarë do të bëjë!
E Premte 8 Gusht 2025, 10:10
Dritare.net
Kryeministri izraelit, Benjamin Netanyahu, ka prezantuar planin për një ofensivë të re ushtarake në Rripin e Gazës, duke shkaktuar shqetësime të mëdha brenda ushtrisë, reagime kundërshtuese nga familjet e të marrëve peng, si dhe kritika për rritjen e numrit të viktimave palestineze. Ky plan po rrezikon gjithashtu izolimin më të madh ndërkombëtar të Izraelit.
Para mbledhjes së kabinetit të sigurisë, ku u miratua propozimi për marrjen nën kontroll të plotë të qytetit të Gazës, Netanyahu në një intervistë për Fox News theksoi se Izraeli synon të sigurojë kontroll të plotë për të garantuar sigurinë e vendit, për të larguar Hamasin nga pushteti dhe për të transferuar më pas qeverisjen civile tek një palë tjetër. Megjithatë, ai nuk dha detaje se kush do të merrte përgjegjësinë qeverisëse.
"Ne nuk duam ta qeverisim atë," tha Netanyahu në anglisht. "Nuk duam të jemi aty si autoritet qeverisës. Duam ta dorëzojmë te forcat arabe."
Megjithëse nuk specifikoi se cilat vende mund të përfshihen, kjo është një nga rrallat shenja për atë që Netanyahu mund të parashikojë për një Gaza pas luftës.
Ndërkohë, ushtria izraelite, e cila thotë se kontrollon tashmë rreth 75% të territorit, do të shtrihet në zonat qendrore të Gazës, ku jeton rreth një milion palestinezë dhe ku besohet të mbahen pengjet.
Kjo ofensivë, që mund të zgjasë muaj të tërë, pritet të shkaktojë zhvendosje masive të civilëve dhe të përkeqësojë krizën humanitare në rajon.
Kjo situatë ka nxitur kritika të reja nga shtete që kërkojnë përfundimin e luftës që ka nisur më 7 tetor 2023 si përgjigje ndaj sulmeve të Hamasit.
Divergjencat mes udhëheqjes politike dhe ushtarake janë evidente, pasi shefi i stafit të ushtrisë izraelite, gjenerali Eyal Zamir, ka paralajmëruar Netanyahu se një pushtim i plotë i Gazës do të ishte “një kurth”. Ai ka theksuar se ofensiva mund të rrezikojë jetën e 20 pengjeve që besohet të jenë ende gjallë, si dhe të ushtarëve izraelitë të lodhur.
Familjet e pengjeve ndajnë këto shqetësime dhe theksojnë se mënyra e vetme për lirimin e tyre është përmes një marrëveshjeje me Hamasin.
Sipas gazetës Maariv, ekziston vlerësimi që shumica, ose edhe të gjitha pengjet e gjalla, mund të humbin jetën gjatë ofensivës së zgjeruar, qoftë nga autorët e tyre apo rastësisht nga forcat izraelite.
Po ashtu, opinioni ndërkombëtar është i ndarë. Ambasadori britanik në Izrael, Simon Walter, e ka quajtur pushtimin e plotë të Gazës si një “gabim të madh”, duke refuzuar gjithashtu akuzat se njohja e mundshme nga Britania e Shtetit Palestinez është një shpërblim për Hamasin.
Ndërkaq, përfaqësuesi amerikan Mike Huckabee, një mbështetës i fuqishëm i Izraelit, tha se vendimi i plotë për kontrollin e Gazës është në dorën e qeverisë izraelite.
Netanyahu nuk ka ofruar ende një vizion të qartë për të ardhmen e Gazës pas luftës, duke refuzuar të pranojë rolin qeverisës të Autoritetit Palestinez, i cili administron Bregun Perëndimor.
Sondazhet tregojnë se shumica e opinionit publik izraelit favorizon një marrëveshje me Hamasin për lirimin e pengjeve dhe përfundimin e luftës, por udhëheqësit izraelitë thonë se Hamas për momentin nuk është i interesuar për negociata, duke u ndjerë më të fuqizuar për shkak të presionit ndërkombëtar mbi Izraelin./K.C/dritare.net
