Dita e katërt e konfliktit Izrael-Iran, ja çfarë duhet të dini!
E Hënë 16 Qershor 2025, 16:04
Dritare.net
Konflikti mes Izraelit dhe Iranit ka hyrë në ditën e katërt, duke shënuar një përshkallëzim të ndjeshëm të dhunës dhe pasigurisë në rajon. Sulmet e ndërsjella po intensifikohen, me pasoja të rënda për civilët dhe infrastrukturën. Ndërkohë që numri i viktimave rritet ndjeshëm në të dyja vendet, paralajmërimet nga udhëheqësit politikë dhe ushtarakë po shtohen, duke krijuar një klimë frike dhe pasigurie tek popullata. Megjithatë, shfaqen edhe sinjale për mundësi negociatash, ndërsa tensionet gjeopolitike përfshijnë aktorë të mëdhenj si Shtetet e Bashkuara. Më poshtë gjeni një përmbledhje të zhvillimeve kryesore.
Çfarë duhet të dini për konfliktin!
Shpërthime dhe goditje të reja: Përplasja hyn në ditën e saj të katërt, me sulmet që po zgjerohen. Irani goditi një rafineri izraelite dhe një pjesë të rrjetit elektrik, ndërsa shpërthime dhe sulme ndaj banesave kanë ndodhur në shumë zona të Izraelit.
Paralajmërime nga të dyja palët: Garda Revolucionare u bën thirrje banorëve të Tel Avivit të largohen nga qyteti. "Largohuni nga Teherani", u thotë banorëve të tij Netanjahu.
Hapësirë për negociata: Irani kërkon bisedime me SHBA-në dhe Izraelin për të ndalur armiqësitë, raporton Wall Street Journal.
Rritje e shpejtë e viktimave – civilët në panik: Numri i të vdekurve po rritet ndjeshëm. 24 persona janë vrarë në Izrael që nga fillimi i përplasjeve, ndërsa numri i viktimave në Iran ka arritur në 224. Shumë banorë të Teheranit po përpiqen të largohen nga qyteti për arsye sigurie.
Trump refuzoi planin për të vrarë Khamenei-n: Sipas dy zyrtarëve amerikanë që folën për CNN, Trump refuzoi një plan izraelit për të vrarë udhëheqësin suprem të Iranit, Ali Khamenei. Benjamin Netanjahu mohoi se ka ekzistuar një plan i tillë.
Operacion i mbështetur prej kohësh nga SHBA: Operacioni i Izraelit parashikohet të zgjasë "javë, jo ditë", me miratim të heshtur nga SHBA, sipas zyrtarëve izraelitë dhe amerikanë. Trump pranoi se përfshirja amerikane është e mundshme./K.C/dritare.net
