Avioni "Blue Panorama" mbushet me tym, bën ulje të detyruar në Rinas pak pas ngritjes

Ulja emergjente e një avioni të linjës 'Blue Panorama" ka shkaktuar panik te pasagjerët. Avioni po udhëtonte nga Tirana drejt Ankonës, dhe ka bërë ulje emergjente pak minuta pas nisjes nga aeroporti 'Nënë Tereza". Një pasagjer thotë për 'balkanweb' se, ishin nisur normalisht në orën 07:00 të mëngjesit me një avion të linjës “Blue Panorama”, kur ndodhi defekti në ajër.

“U ngritëm normalisht, ishim në det, sapo kishim kaluar Durrësit kur pamë tym të dilte nga avioni, kabina u mbush me tym. Ishte tmerr, kishte edhe fëmijë që nisën të qanin.",- tha pasagjeri.

Pasagjeri thotë gjithashtu se, nuk u janë lejuar telefonat për të filmuar, dhe se sipas tij avioni ka bërë disa manovra të rrezikshme para se të ulej.

 “Kabina u mbush me tym kur na njoftuan që do ulemi në Rinas për shkak të defektit. Avioni bëri disa lëvizje shumë të rrezikshme, thamë se u rrëzuam. Është i gjithë faji i avionëve të vjetër që sjellin në Shqipëri si të ishim bota e tretë. Pilotët na e shpëtuan jetën, nuk e di se si mundën ta ulnin atë avion në gjendjen që ishte.",- tha pasagjeri./K.C/dritare.net