Skifterët përleshen me policinë, si u zbulua banda nga shqiptari me 500 makina

Tre shqiptarë u arrestuan nga policia italiane dhe një tjetër mundi të shpëtonte, gjatë aksionit të karabinierëve për goditjen e një bande që vidhte banesat në Milano e Pavia. Mediat italiane raportojnë se në pranga u vunë tre shqiptarë, dhe një i katërt u shpall në kërkim. Policia ra në gjurmë të tyre, pas kontrollit të një automjeti, përdorur nga njëri prej shqiptarëve, i cili rezultonte të kishte në zotërim 500 automjete.

Gjatë kontrollit u zbulua se makina me të cilën ata lëviznin ishte përdorur për të kryer vjedhje në rrethinat e Milanos dhe në provincën e Pavias. Policia kërkoi përforcime dhe banda u bllokua në San Donato Milanese. Shqiptarët e rrethuar nuk kishin mend të dorëzoheshin dhe u përplasën me makinën e policisë.

Gjatë përplasjes automjeti i tyre humbi një rrotë dhe ata ia mbathën në këmbë. Arratia nuk shkoi mirë, pasi drejtuesi i mjetit dhe dy të tjerët, pasi u përleshën me policinë, u prangosën, kurse tjetri shpëtoi.