Bletari: Mjalti Manuka, abuzimi më i madh në treg. Zelanda e Re s’furnizon dot botën; ajo që shitet këtu është mashtrim
E Mërkurë 3 Dhjetor 2025, 21:09
Dritare.net
Në emisionin “Shqip" të Rudina Xhungës në DritareTv, apiterapeuti dhe bletari me 55 vite eksperiencë, Bedri Statovci, ngriti një nga alarmet më të forta për konsumatorët: mjalti Manuka që shitet në tregjet shqiptare dhe kosovare është mashtrimi më i madh ushqimor.
“Është turpi i botës të shitet Manuka në Prishtinë e Tiranë”, tha ai.
Statovci foli hapur:
“Nuk ka shans mjalti Manuka të vijë këtu. Zelanda e Re nuk e furnizon dot as tregun e vet, jo më gjithë botën. Ajo që shitet këtu është absurdi i absurdeve.”
Ai e konsideroi këtë fenomen si manipulim të konsumatorëve dhe një treg të mbushur me produkte të dyshimta.
Pse Manuka nuk është ajo që na shitet?
Sipas Statovcit:
• Prodhimi i saj është shumë i kufizuar.
• Zona e Manukës në Zelandë të Re është e vogël.
• Kërkesa globale është qindra herë më e madhe se prodhimi real.
• Nuk ka mundësi logjistike që mjalti origjinal të mbërrijë në Ballkan në sasi të mëdha.
“Ajo që shitet këtu si Manuka, të paktën 99%, nuk ka lidhje me bletën. Është produkt tregu, jo natyre.”
“Analfabetët dhe të sëmurët e ngritën Manukën në qiell”
Statovci shpjegoi se kultin e Manukës e krijuan:
• njerëz me probleme shëndetësore
• marketingu agresiv
• padija dhe mungesa e analizave profesionale
Dhe theksoi:
“Mjalti Manuka dominon vetëm me një element, një lloj antibiotiku. Por mjaltit i duhen shumë më tepër elemente për të qenë shërues.”
Mjalti vendas është më i vlefshëm se Manuka
I pyetur nga Rudina Xhunga, Statovci e pohoi fort:
“Mirë bëni që qëndroni te mjalti i vendit. Mjalti ynë, shumëngjyrësh, ka shumë më shumë vlera se Manuka.”
Ai theksoi se vlerat e Manukës janë të ekzagjeruara, ndërsa vlerat e mjaltit të rajonit tonë janë të pavëna në dukje, por shumë të mëdha shkencërisht.
Thirrja për konsumatorët
Statovci paralajmëroi:
• Mos blini Manuka në tregun shqiptar!
• Mos besoni çfarë shkruhet në kavanoza pa analizë!
• Ruani paratë dhe shëndetin tuaj!/K.C/dritare.net
