Flet ambasadori i parë amerikan në Shqipëri, Rajerson: Berisha non grata, sinjal i madh kundër korrupsionit nga Uashingtoni
E Premte 1 Tetor 2021, 18:06
Dritare.net
Ambasadori i parë amerikan në Shqipëri, Rajerson në një intervistë për Zërin e Amerikës ka bërë një deklaratë të fortë teksa u pyet për shpalljen non grata të Sali Berishës. Rajerson u shpreh se shpallja non grata e Berishës është një sinjal i fortë se Uashingtoni do të godasë korrupsionin.
Zëri i Amerikës: Ju keni vazhduar t’i ndiqni zhvillimet në Shqipëri, pasi ju kuptoni dhe flisni shqip. Kur ishit në Shqipëri, udhëheqësi i opozitës atëhere Sali Berisha, gëzonte mbështetje të madhe nga Shtetet e Bashkuara. Sot pas 30 vjetësh, qëndrimi ka ndryshuar 180 gradë. Sekretari i Shtetit e ka përcaktuar Sali Berishën për korrupsion madhor. Si shpjegohet? Cili është mendimi juaj për këtë ndryshim?
Ambasadori Rajerson: Ato që kanë ndodhur në Shqipëri janë inkurajuese, por edhe shumë zhgënjyese. Dikush më pyeti kohët e fundit se përse e bëri Sekretari Blinken këtë, përse jo një njoftim nga një prej zëdhënësve. Për mua ky është një sinjal kundër korrupsionit, jo vetëm për Shqipërinë, por se Uashingtoni do ta godasë korrupsionin sa herë ta shohë, pavarësisht se për kë bëhet fjalë. Ajo që ka rëndësi është çfarë bën tani ky, apo ai person, ky, apo ai entitet. Ndoshta para 25-30 vitesh nuk ishin përfshirë në korrupsion, por janë përfshirë më pas dhe prandaj tani po merr vëmendje kaq të lartë./Dritare.net
