Partia Demokratike: Ja 4 pyetjet që duhet t’u përgjigjen Rama dhe Veliaj!

Për çështjen e dytë të Unazës së Re, ku akuzohet mazhoranca për ndryshim të planit urbanistik, për t’i favorizuar një plan ndërtimi, Edmond Begos, ka reaguar për herë të dytë edhe Partia Demokratike. Partia Demokratike ka katër pyetje për kryeministrin, Edi Rama dhe kryebashkiakun e Tiranës, Erion Veliaj.

“Edi Rama detyroi sot Erion Veliajn dhe Arben Ahmetajn të bëhen qesharakë në sytë e shqiptarëve. Duke bërë sikur nuk kuptojnë për çfarë kanë firmosur, ata synojnë të mbulojnë skandalin tjetër në zonën pranë Unazës së Re.

E vërteta, e bazuar në dokumente është se Edi Rama dhe Erion Veliaj kanë ndryshuar Planin Urbanistik të Tiranës, në mënyrë që Lumi i Lanës të mos prekë tokën ku Edmond Bego do të investojë 60 milionë euro para të pista.

Edi Rama dhe Erion Veliaj duhet t’u thonë shqiptarëve:

– Pse u ndryshua Plani Urbanistik i Tiranës dhe pse u devijua Lumi i Lanës në zonën ku planifikon të ndërtojë Edmond Bego?

– A ka aplikuar Edmond Bego për leje ndërtimi me projektin e hartuar nga kompania italiane MISALAB?

– A ka regjistruar në hipotekë Edmond Bega pronat për efekt të ndërtimit të pallateve?

– A do të prishen banesat e 200 familjeve për t’i hapur rrugë ndërtimit të pallateve nga Edmond Bega?

Partia Demokratike e ka të qartë se Edi Rama dhe Erion Veliaj nuk mund të përgjigjen dot, sepse janë pjesë e projektit mafioz për pastrimin e parave të pista të krimit.”,- thekson PD-ja./K.C/dritare.net