Emin Haziri, shefi shqiptar që jua prezantuam në DritareTV, sot merr yllin Michelin
E Mërkurë 19 Nëntor 2025, 14:02
Dritare.net
Ju kujtohet Emin Haziri, shefi shqiptar që po shkëlqen në Milano. E treguam para pak kohësh historinë e tij në Shqip nga Rudina Xhunga në DritareTV. Ne e dinim që ishte një yll, ashtu siç mori sot yllin e tij të parë Mishelin për restoranin Procaccini Milano. Ky është një nga çmimet më prestigjioze në botën e gastronomisë dhe Emini e mori. Një djalë nga Klina që punoi pa pushim, besoi pa u lëkundur dhe sot dëshmon se ëndrrat e mëdha bëhen realitet.
Historia e Emin Hazirit, e rrëfyer së fundmi edhe në intervistën me Rudina Xhungën është një tregim i fuqishëm i një djali nga Klina e Kosovës, që në moshën 7-vjeçare u largua me familjen drejt Italisë. Atje nisi jetën nga e para, mes sfidave të emigrimit, një gjuhe të re dhe kushteve të vështira. Fillimisht ëndërronte futbollin, por më pas gjeti veten në kuzhinë, vendi ku kuptoi se mund të tregonte historinë e tij.
Edhe pse familja e donte doktor, ai zgjodhi rrugën e tij dhe nisi të punonte në kuzhina prestigjioze në Itali, Francë e Danimarkë. Me këmbëngulje dhe punë pa pushim, në moshën vetëm 24-vjeçare u bë shef i pavarur dhe sot drejton “Prokacini Milano”, restorant që tani mban yllin Michelin.
“Edhe pse nuk u bëra doktor, siç donte mami, ylli Michelin ishte fitore për të gjithë ne,” ka thënë ai me emocion në intervistë.
Sot, historia e Emin Hazirit është një frymëzim për të gjithë të rinjtë shqiptarë.
Mesazhi i tij është i thjeshtë dhe i fuqishëm:
“Ne shqiptarët jemi punëtorë dhe krijues. Kur besojmë dhe qëndrojmë bashkë, mund të arrijmë gjithçka.”
Ky yll, thotë Haziri, është vetëm fillimi i një rruge edhe më të madhe./K.C/dritare.net
