Balluku reagon për herë të parë: Nuk do të sulmoj drejtësinë, do të pres që e vërteta të dalë në dritë!
E Mërkurë 19 Nëntor 2025, 16:04
Dritare.net
Zv.kryeministrja Belinda Balluku ka reaguar pas zhvillimeve të ditëve të fundit, duke theksuar se pavarësisht “baltës, aludimeve dhe gjysmë të vërtetave” që qarkullojnë, ajo ndjehet e detyruar t’u flasë qytetarëve që i kanë besuar përfaqësimin e tyre.
Balluku thotë se nuk ka ndërmend t’i kundërvihet drejtësisë, edhe kur çështjet prekin personalisht atë.
"Sot në Kuvend ndava disa fjalë me qytetarët, që më kanë besuar përfaqësimin e tyre, jo për të kompensuar baltën, aludimet, gjysmë të vërtetat apo gënjeshtrat e thëna me bollëk këto kohë, por për detyrimin që kam ndaj kujtdo në këtë vend, që ka vendosur të vlerësoj punën e jo baltën.
Nuk do të dëgjoni kurrë nga unë akuza, sharje e kërcënime për drejtësinë e re, edhe kur prekem personalisht, as himne e lëvdata, pasi besoj thellësisht se kjo drejtësi e re, e dalë nga reforma, produkt i vullnetit politik të Edi Ramës dhe Partisë Socialiste, duke kryer misionin për të cilin u reformua, patjetër me pikat e saj të forta e të dobëta, si gjithçka e re që do të konsolidohet dita ditës.
Nuk do të merrem kurrë me prokurorë e gjyqtarë, pasi secili prej tyre bën detyrën ashtu si e gjykon. Nuk do të prononcohem për çështje nën hetim pasi ato kanë rrugën e tyre, të cilën do e ndjek me diskrecion të plotë, derisa e vërteta të marrë formë të prerë, cilado qoftë kjo", shkruan Balluku./dritare.net
