Byreqet shqiptare më të famshëm të Bostonit!
E Martë 14 Tetor 2025, 10:10
Dritare.net
Pasi la pas tmerrin e arratisjes dhe sfidat e para të emigracionit, Elena Lekaj filloi të ndërtonte ëndrrën e saj. Edhe pse në Shqipëri kishte dashur të bëhej kuzhiniere, rrethanat e çuan në një rrugë tjetër. Në vitin 1992, ajo u martua me një djalë shkodran dhe për pak kohë u kthye në Shqipëri, por shpejt kuptoi se nuk mund të jetonte më atje. 'Nuk isha e qetë,' pohon ajo në intervistën për emisionin Shqip nga Rudina Xunga në Dritare TV. Duke bindur bashkëshortin e saj, ata u rikthyen në Amerikë me një plan të qartë.
'Kam menduar të hap një restorant,' i tha ajo burrit të saj, i cili e mbështeti plotësisht. Pas një viti pune intensive, në vitin 1995 ata hapën restorantin e tyre të parë. Ky ishte vetëm fillimi. Biznesi i tyre lulëzoi dhe ata arritën të hapnin deri në dhjetë restorante me kuzhinë të përzier amerikane dhe italiane. Megjithatë, ëndrra e vërtetë e Elenës ishte ende e paplotësuar. Ajo dëshironte të sillte një copëz të vendlindjes së saj në Amerikë.
Kështu lindi 'Shkodra Byrek', një restorant i dedikuar tërësisht traditave dhe ushqimeve shqiptare. 'Kam dëshirë të hap një restorant me traditat e ushqimet shqiptare,' thotë ajo. Ky biznes nuk ishte thjesht një sipërmarrje financiare, por një mision për të ruajtur dhe promovuar kulturën. 'Nuk e harroj kurrë Shqipërinë,' thekson Elena. Përmes byrekut, tavave dhe gatimeve tradicionale, ajo jo vetëm që ka ndërtuar një jetë të suksesshme, por ka krijuar një vatër ku shqiptarët e Amerikës mund të gjejnë shijen e shtëpisë dhe ku amerikanët mund të zbulojnë pasurinë e kuzhinës shqiptare./L.F-dritare.net
