Historia e Saimir Xhaxhajt, shqiptarit që lë pa fjalë shefat e kuzhinës italiane!
E Martë 25 Gusht 2020, 09:09
Dritare.net
Nga Lorena Fjolla
Saimir Xhaxhaj, ka bërë xhiron e restoranteve në Itali, që prej moshës 15 vjeçare. Një djalë me ambicie dhe një pasion të madh për kulinarinë, që e ka bërë sot të jetë një emër i rëndësishëm i kuzhinës italiane. Ai ka lindur në Lushnjë, dhe deri në klasën e pestë ka qëndruar në Shqipëri. Në 1999, së bashku me familjen u larguan drejt Italisë, për një të ardhme më të mirë.
Qëndroi për 6 vjet në Kalabri, ku edhe studionte. Pasioni për kulinarinë e zhvendosi atë në Firence. Ndërkohë që studionte në shkollën e kuzhinës, për shkak të nevojës dhe dëshirës për pavarësi ekonomike, nisi që 17 vjeç të punojë në një restorant në San Casciano.
Nga aty nisi karrierën si kuzhinier.
"Doja të mësoja, të rritesha profesionalisht, të fitoja përvojë. Nisa të punoja një sezon në Hotel Relais Certosa në Firence dhe sezonin tjetër te Borgo Il Poggiaccio në Siena. Përvoja e fundit, më dha shumë vetëbesim, pasi unë isha ndihma e vetme e kuzhinierit, dhe për këtë arsye isha përgjegjës për përgatitjen e të gjitha pjatave, nga e para, deri te ëmbëlsira.
Një mbrëmje, në mesin e klientëve tanë, mbërriti një kuzhinier nga Firence i cili ishte shumë i impresionuar nga pjatat e mia. I kishin lënë aq shumë mbresa, sa më priti deri në përfundim të punës, për të më kërkuar të punoja me të.
Më pas për dy vjet, punova si menaxher në hotelin Helvetia Bristol në Firence. Falë mbështetjes së mësuesit tim gjatë shkollës së mesme, arrita që të jem pjesë e hotel Il Saviatino në Firence, ku kam punuar me kuzhinier Carmine Caló. Në mars të 2012 u transferova në Verona, për të dhënë gjithë përvojën time me kuzhinier Calon, në Palazzo Victoria, hotel me 5 yje në Verona.
Por etja për ndryshim, nuk më la të qëndroja edhe për shumë gjatë. Tani prej tre vjetësh punoj si kryekuzhinier në La Canonica, në Verona", tregon ai për mediat italiane.
Pjatat e tij janë art më vete, jo më kot shefat e kuzhinës italiane, mbeten pa fjalë përballë tij!
Saimiri, ndonëse jeton prej vitesh në Itali, flet një shqipe të pastër. Ai ka krijuar familjen e tij atje. Tashmë bashkëjeton me të dashurën e tij italiane. Ata janë prindër të dy djemve, 8 vjeç dhe 2 muajsh .
Në një prononcim për dritare.net ai shprehet se ka vetëm një qëllim me pjatat e tij: të lë klientët pa fjalë. Dhe duket se këtë ia ka arritur me sukses.
Ëndrra e tij është të arrijë të hapë një restorant të tijin, por kjo nuk është e thjeshtë.
Por me siguri, me pasionin që e ka shtyrë t'i ngjisë shkallët e suksesit në pak kohë, as kjo ditë nuk do të nuk do të jetë e largët./dritare.net
