Nga Corriere della Sera
Fytyrat e buzëqeshura të fëmijëve të fotografuara në sheshin e lojërave, në dhomat e tyre të gjumit ose në pyll, të kornizuara dhe të ekspozuara në rrugë, në stola ose në një shkallë, ngjitur në shtyllat e dritave. Shumë foto ekspozohen ndaj vështrimit të kujtdo në rrugët e Testaccio-s dhe zonave të tjera të Romës për të bërë vetëm një pyetje: "A do ta nxirrnit fëmijën tuaj në rrugë?". Është provokimi i studentëve të Institutit Evropian të Dizajnit, të cilët kanë dashur të ndërgjegjësojnë prindërit për rreziqet dhe pasojat e ekspozimit të tepërt në internet të përmbajtjeve për fëmijët e tyre.
Fenomeni i prindërve që publikojnë pa dallim foto dhe informacione për fëmijët e tyre në platformat online quhet Sharenting. Dhe prej disa kohësh zërat e ekspertëve janë shumëfishuar mbi rreziqet për privatësinë dhe sigurinë e të miturve dhe mbi gjurmën e përhershme digjitale që lihet në internet dhe mund të ndikojë në jetën e fëmijëve.
Pikërisht për të mbrojtur të miturit nga ekspozimi në internet pak javë më parë, u depozitua në Dhomë një projektligj, i cili nëse miratohet, do të kufizojë ndjeshëm mundësinë e prindërve për të publikuar video dhe imazhe të fëmijëve të tyre. Tre nenet që përbëjnë propozimin “Dispozitat për të drejtën e figurës së të miturve", synojnë të mbrojnë më mirë privatësinë e fëmijëve, të cilët pasi të mbushin moshën katërmbëdhjetë vjeç do të mund të kërkojnë fshirjen nga uebi i të gjitha përmbajtjeve që lidhen me ta.
Nisma e studentëve IED, e quajtur "Korniza private" synon të promovojë ndërgjegjësim më të madh në përdorimin e mediave sociale, sepse ajo që prindërit e konsiderojnë një kujtim mund të bëhet një burim informacioni delikat për të tjerët. Pas çdo kornize ka një kod QR që lidhet me faqen e internetit të grupit. Fëmijët e parë në fushatë, shpjegojnë krijuesit, nuk ekzistojnë: fotot u krijuan duke përdorur inteligjencën artificiale falë mijëra fotove të publikuara nga prindërit në rrjetet sociale./K.C/dritare.net
