Drejtoresha- pastruese/ Pas zënkave me Xhafën, ja në cilën ministri përfundon Sufali!
E Mërkurë 1 Nëntor 2017, 10:10
Dritare.net
Ish drejtoresha e Lojërave të Fatit, Luneda Sufali, ka marrë një post të ri në Ministrinë e Shëndetësisë. Ajo do të jetë Drejtoresha e re e Shërbimit Social Shëndetësor dhe është prezantuar nga vetë ministrja Manastirliu.
“Drejtoresha e re e SHSSH, Znj Luneda Sufali, është prezantuar para stafit të SHSSH nga Ministrja e Ministrisë së Shëndetësisë dhe Mbrojtjes Sociale, Znj. Ogerta Manastirliu. Duke i uruar Znj. Sufali suksese në detyrën e re, ministrja Manastirliu theksoi mbështetjen për SHSSH, në kapërcimin e sfidave me të cilat ky institucion përballet, për ofrimin e shërbimeve shoqërore për të gjithë njerëzit dhe individët në nevojë sipas standardeve të përcaktuara”, shkruan ministrja e shëndetësisë.
Sufali ka qenë Drejtoresha e Njësisë së Mbikëqyrjes së Lojërave të Fatit, 2013- 2015 dhe më pas dha dorëheqjen. Ajo u përfol në medie pas përpasjes në Komisionin e Ligjeve, të cilin në nëntor të 2015 e drejtonte Xhafaj. Ai i kërkoi të linte sallën, pasi ajo tha se ishte pastruese.
Replikat në komision
Fatmir Xhafaj: Zoti ministër, ndjesë për vonesën, por tani mbaruam ligjin e energjisë. S’keni ardhur kur keni mbrojtur buxhetin kaq shumë nga Ministria, keni ardhur për lojërat e fatit.
Shkëlqim Cani: U trembëm nga hera e kaluar…
Luneda Sufali: Jemi dhe nga Lojërat e Fatit, edhe nga Ministria.
Fatmir Xhafaj: S’kisha parë të merrnit kaq staf me vete ndonjëherë.
Pandeli Majko: Bëj atë pyetjen që thashë unë dje, kush ka konflikt interesi të largohet.
Luneda Sufali: Jam e sigurt fare, të gjithë! I bie të prishet Komisioni.
Pandeli Majko: Çohem unë i pari. Kam lujt skedina në shkollë të mesme…
Luneda Sufali: Janë të gjithë me konflikt interesi, ta garantoj unë me 100 për qind.
Bashkim Fino: Shiko këtej nga opozita…
Luneda Sufali: E, kush ka konflikt!, Këtu jeni të gjithë. Kanë konflikt …
Oerd Bylykbashi: Zonjë do dekriminalizohet shpifja… Edhe shpifjen do ta dekriminalizojmë. Kujdes!
Pandeli Majko: Thuaja pak kryetarit të Komisionit se duhet ta dëgjojë live…
Luneda Sufali: Duhet të bëhet pyetja që t’ia them…
Fatmir Xhafaj: A ka mundësi të mos flasësh më, ose do dalësh përjashta…Këtu e drejtoj unë mbledhjen, aty ku merr pjesë ti, drejtojnë ata (ministri).
Luneda Sufali: Patjetër, por po i ktheja përgjigje zotit Majko.
Fatmir Xhafaj: Patjetër, por përgjigje kur jam unë nuk mund të japësh. Nuk e di çfarë pune bën atje në ministri po…
Luneda Sufali: Pastruese. (Qesh)
Fatmir Xhafaj: Atëherë dil nga salla.
Luneda Sufali: Jam e ftuar në Komision.
Fatmir Xhafaj: Atë e vendos unë, të lutem largohu nga karrigia.
Luneda Sufali: Nuk largohem!
Fatmir Xhafaj: Zonjë, urdhëroj unë këtu!
Luneda Sufali: S’mund të largohem. Më kanë caktuar për të ardhur të mbroj diçka…
Fatmir Xhafaj: E përcaktoj unë. Prandaj tërhiqu mbrapa aty!
Luneda Sufali: Nuk mund të largohem!
Fatmir Xhafaj: Tërhiqu atëherë se do të ndërpres Komisionin, po të them!
Luneda Sufali: Ndërprite…
Fatmir Xhafaj: Nuk thërras pastrueset unë këtu…
Luneda Sufali- Shkëlqim Canit: E kupton çfarë po më kërkon?! Unë kam ardhur në Komision të mbroj ligjin këtu…
Fatmir Xhafaj: Zoti ministër, do marrësh masa apo të ndërpres Komisionin.
Shkëlqim Cani: Po ishte humor, po bënim shaka.
Fatmir Xhafaj: Jo të lutem, nuk ka shaka.
Shkëlqim Cani: Po kjo është drejtoresha e Lojërave të Fatit.
Fatmir Xhafaj: Po aq më keq akoma, në qoftë se është drejtoresha.
Shkëlqim Cani: Po ne po bënim shaka deri tani.
Bashkim Fino: Po bënim humor…
Fatmir Xhafaj: Çfarë humori, pse humor do bëjmë këtu?! Pse për humor kemi ardhur këtu ne me punonjësit tuaj.
Shkëlqim Cani: Nga që s’kishte filluar mbledhja, prandaj.
Fatmir Xhafaj: Muhabet është ky. Drejtoresha që bën shaka në Komision?! Nuk di çfarë është Parlamenti? Mësojani punonjësve tuaj se çfarë është Parlamenti, pastaj hajdeni…
Bashkim Fino: Nga Parlamenti buron qeveria, donte të thoshte…
Fatmir Xhafaj: Duket i paska ec mirë këto kohë, që flet komplet qesim.
Bashkim Fino- Luneda Sufalit: Ç’na bërë moj./L.P./Dritare.net
