Presidenti amerikan Donald Trump njoftoi se forcat amerikane kanë kapur Nicolás Maduro dhe bashkëshorten e tij, Cilia Flores, pas një serie sulmesh të mëdha brenda Venezuelës. Sipas Trump, Maduro dhe gruaja e tij janë dërguar jashtë vendit, ndërsa vendndodhja e tyre aktuale mbetet e panjohur.
Nga ana tjetër, ministri i mbrojtjes i Venezuelës, Vladimir Padrino, deklaroi se forcat e armatosura do të mbrojnë sovranitetin e vendit. Kjo ngjarje vjen pas një presioni të gjatë amerikan ndaj qeverisë Maduro, të cilin administrata Trump e akuzon për trafikun e drogës dhe dërgimin e kriminelëve drejt SHBA-së.
Si u zhvillua operacioni?
Detaje të sakta mbi operacionin nuk janë bërë publike. Disa baza ushtarake dhe zona të ndryshme janë goditur.
Sipas raporteve, forca e elitës amerikane Delta Force ka qenë përgjegjëse për kapjen e Maduros. Ende nuk dihen më shumë hollësi mbi mënyrën se si u realizua operacioni.
Kush është Nicolás Maduro?
Maduro, ish-shofer autobusi dhe lider sindikal, u bë president i Venezuelës në 2013, pas vdekjes së Hugo Chávez. Që nga ajo kohë, Partia Socialiste e Venezuelës (PSUV) ka kontrolluar shumicën e institucioneve kyçe, përfshirë Asamblenë Kombëtare dhe sistemin gjyqësor.
Në zgjedhjet presidenciale të vitit 2024, Maduro shpallet fitues, ndonëse opozita argumentoi se kandidati i saj, Edmundo González, kishte fituar me shumicë. Nobelistja María Corina Machado kishte qenë gjithashtu pjesë e garës, por ishte përjashtuar nga zgjedhjet.
Arsyeja e sulmeve amerikane
Trump ka justifikuar operacionin me argumentin se Maduro ka shkaktuar valë emigrantësh drejt SHBA-së dhe ka lejuar trafikun e drogës. Dy grupe kriminale venezueliane, Tren de Aragua dhe Cartel de los Soles, janë shpallur si Organizata Terroriste e Huaj (FTO) nga SHBA-ja, me pretendimin se Maduro ka lidhje me to. Maduro i ka mohuar këto akuza dhe ka akuzuar SHBA-në se synon rezervat e naftës së Venezuelës.
Ekspertët e antidrogës vlerësojnë se Venezuela është një lojtar i vogël në trafikimin global të drogës, duke shërbyer kryesisht si rrugë tranziti për drogë të prodhuar në vende të tjera, kryesisht Kolumbi. Fentanyl, droga kryesore e përgjegjshme për vdekjet nga opioidet në SHBA, prodhohet kryesisht në Meksikë dhe arrin SHBA-në kryesisht nga kufiri i jugut.
Prania ushtarake amerikane
SHBA ka vendosur 15,000 trupa dhe një flotë të madhe në Karaibe, duke përfshirë USS Gerald Ford, aeroplanmbajtësin më të madh në botë. Forcat amerikane kanë marrë pjesë edhe në kapjen e tankerëve të naftës dhe kanë goditur disa anije të dyshuara për transportin e naftës së sanksionuar.
Vlera e naftës së Venezuelës
Venezuela ka rezerva të konsiderueshme nafte dhe eksportet e saj financojnë mbi gjysmën e buxhetit të qeverisë. Aktualisht eksporton rreth 900,000 fuçi në ditë, kryesisht drejt Kinës, dhe prodhimi i saj global është relativisht i vogël (0.8%).
Ky operacion shënon një eskalim dramatik në marrëdhëniet SHBA–Venezuelë dhe mund të ketë pasoja të mëdha politike, ekonomike dhe ushtarake për rajonin. Ndërkohë, informacioni mbi gjendjen aktuale të Maduros dhe të bashkëpunëtorëve të tij mbetet i kufizuar./L.F-dritare.net
