Rrëfimi i trajnerit shqiptar Elton Jazexhiu, nga Kombinati në Boston!
E Diel 16 Nëntor 2025, 20:08
Dritare.net
Në një intervistë ekskluzive për Dritare TV, trajneri shqiptaro-amerikan i futbollit, Elton Jazexhiu, ndau historinë e tij frymëzuese të jetës, një udhëtim që nisi nga lagjja e Kombinatit në Tiranë për të arritur në qytetin e Bostonit në Shtetet e Bashkuara.
Jazexhiu rrëfeu për largimin nga Shqipëria në vitin 1995, sfidat, sukseset dhe lidhjen e pashkëputur me atdheun. Karriera e tij në Amerikë është një dëshmi e këmbënguljes dhe pasionit. Pasi la Shqipërinë si student i Institutit “Vojo Kushi”, ai përshkoi një rrugë të gjatë profesionale dhe akademike. Rrugëtimi i tij e çoi nëpër shtete të ndryshme si Utah, Teksas, Pennsylvania dhe San Diego, përpara se të vendosej në Boston, ku aktualisht punon si trajner futbolli në shkollën prestigjioze private Dexter Southfield.
Përveç karrierës sportive, ai nuk e la pas dore asnjëherë edukimin, duke kompletuar studimet Bachelor dhe Master në SHBA, një shembull që ai shpreson t'ua përcjellë edhe katër fëmijëve të tij. Jeta personale e Jazexhiut ka pasur gjithashtu kthesat e saj. Ai foli hapur për fundin e martesës së tij 23-vjeçare me një partnere amerikane dhe për fillimin e një kapitulli të ri me një partnere shqiptaro-amerikane, një inxhiniere e suksesshme me histori të ngjashme emigrimi. Kjo lidhje e re, siç thotë ai, e ka bërë të ndihet më i kompletuar dhe e ka afruar edhe më shumë me rrënjët e tij.
“Partnerja ime është shqiptare dhe më njeh në tërësi, mund të më kuptojë në gjithë thellësinë që kam,” u shpreh ai. Nostalgjia për Shqipërinë mbetet një ndjenjë e fuqishme për të. I frymëzuar nga tregimet e gjyshit të tij, i cili kishte emigruar në Boston në vitet '20, dhe nga ëndrra e të atit për Amerikën, Jazexhiu mban një lidhje të fortë me vendlindjen. Ai dhe partnerja e tij kanë ende prona në Shqipëri, të trashëguara nga prindërit, duke e mbajtur kështu një “derë të hapur” për një rikthim të mundshëm në të ardhmen.
“Brenda pesë ose dhjetë vjetëve, Shqipëria akoma afrohet shumë për mua,” tha ai, duke theksuar se dëshira për t'u kthyer nuk i mungon. Në fund, Elton Jazexhiu dha një perspektivë realiste mbi “ëndrrën amerikane”. Ai theksoi se suksesi në Amerikë nuk vjen lehtë, por kërkon punë të palodhur, edukim dhe rezistencë. “Jeta është luftë,” tha ai, duke shtuar se Amerika ofron mundësi për ata që janë të gatshëm të luftojnë për to.
Ai gjithashtu foli për rëndësinë e sportit si një “ilaç” kundër sfidave të shëndetit mendor, si depresioni, një problematikë e theksuar në shoqërinë moderne. Historia e tij është një pasqyrë e jetës së diasporës shqiptare, një jetë e ndërtuar mes dy botëve, me zemrën dhe mendjen gjithmonë të lidhur me Shqipërinë./dritare.net
