Kush e shpëtoi Uzinën e Ferrokromit! Historia e paharruar e marsit ‘97
E Premte 27 Qershor 2025, 20:08
Dritare.net
Në marsin e vitit 1997, kur depot e armëve në Shqipëri u hapën dhe vendi u përfshi nga një kaos i përgjithshëm, pak njerëz menduan për ruajtjen e aseteve industriale. Por në Burrel, në zemër të krizës, një grup punonjësish të përkushtuar, me në krye kryeinxhinierin Telat Haxhiu dhe specialistin elektrik Xhavit Metra, morën një vendim që do të ndryshonte fatin e Uzinës së Ferrokromit dhe të qytetit.
Në një rrëfim për emisionin “Shqip” nga Rudina Xhunga në DritareTV, ata kujtojnë momentet kur armët dolën nga depot e Qafë-Shtamës dhe mbërritën deri në ambientet e uzinës. Turni i parë u largua nga frika, ndërsa qyteti ishte në panik. Por ata, bashkë me një grup inxhinierësh dhe punëtorësh të tjerë, vendosën të mos e braktisin vendin e punës. U rikthyen në uzinë dhe me vendosmëri e ruajtën nga grabitja. Jo vetëm që e mbrojtën, por rifilluan menjëherë prodhimin, duke e kthyer uzinën në një simbol qëndrese dhe shprese.
Falë guximit dhe përkushtimit të atyre punonjësve, Uzina e Ferrokromit në Burrel nuk u shkatërrua, si shumë ndërmarrje të tjera në atë periudhë. Sot, kjo uzinë vazhdon të funksionojë – nga një koncesion në tjetrin – duke prodhuar ferrokrom dhe duke mbajtur gjallë industrinë në një nga zonat më të thella të vendit.
Historia e Telat Haxhiut, Xhavit Metrës dhe kolegëve të tyre është një dëshmi e jashtëzakonshme e forcës njerëzore përballë rrezikut. Është një kujtim se Shqipëria ka pasur dhe ka ende burra që nuk dorëzohen, që e duan punën dhe atdheun, dhe që janë të gatshëm të sakrifikojnë për të ruajtur atë që është e përbashkët.
Ata nuk janë vetëm punonjës të një uzine. Ata janë heronj të heshtur, që shpëtuan një pasuri kombëtare – dhe sot, Shqipëria u është borxhlie./dritare.net
