Greqia bëri eksperiment me mua! Rrëfimi i padëgjuar!
E Premte 10 Prill 2026, 18:06
Dritare.net
“Më dhanë pak shpresa për jetë” — Rrëfimi prekës i Valentina Kurçani për betejën me leuçeminë agresive
Emigrantja nga Greqia, Valentina Kurcani, e ftuar në emisionin “Shqip nga Rudina Xhunga në DritareTV rrëfeu betejën e saj të vështirë me sëmundjen e rëndë që i rrezikoi jetën.
Në moshën 50-vjeçare, kur mendonte se kishte kaluar sfidat më të mëdha të jetës, emigrimin, rritjen e fëmijëve vetëm dhe humbjen e bashkëshortit, Valentina u përball me një tjetër goditje të fortë: u diagnostikua me leuçemi akute.
Diagnoza erdhi papritur dhe ndryshoi gjithçka brenda pak ditësh. Ajo kujton se gjendja e saj shëndetësore u përkeqësua shumë shpejt, duke e detyruar të shtrohej menjëherë në spital.
“Mjekët më thanë se ishte një formë shumë agresive. Më dhanë pak shpresa për jetë,” rrëfen ajo me emocione të forta.
Periudha që pasoi ishte një nga më të vështirat e jetës së saj. Valentina kaloi rreth nëntë muaj në izolim të plotë, për shkak të trajtimit të fortë dhe rrezikut të infeksioneve. Ajo nuk mund të takonte askënd, ndërsa familja e saj ishte larg.
Në atë kohë, ajo ishte praktikisht vetëm. Bashkëshorti i saj kishte ndërruar jetë vite më parë, djali ishte ende i vogël dhe vajza jetonte jashtë vendit. Megjithatë, ajo vendosi të luftonte.
“Kam luftuar shumë. Kishte ditë që nuk mendoja se do t’ia dilja. Por mendoja për fëmijët e mi dhe gjeja forcë,” tregon ajo.
Trajtimi ishte i vështirë dhe i gjatë. Valentina shpjegon se iu nënshtrua terapive intensive, ndërsa në një moment mjekët aplikuan një trajtim eksperimental, që sipas saj, i shpëtoi jetën.
“Më bënë një eksperiment. Ishte shpresa ime e fundit. Dhe ja ku jam sot,” thotë ajo me mirënjohje.
Pas muajsh të gjatë në spital, Valentina arriti të fitojë betejën me sëmundjen, por rikuperimi ishte po aq i vështirë. Ajo tregon se kur doli nga spitali nuk mund të ecte dhe ishte shumë e dobët fizikisht.
“Dola në karrocë. Nuk mund të ecja. Duhej të mësoja gjithçka nga e para,” kujton ajo.
Me vullnet të jashtëzakonshëm dhe përkushtim, Valentina arriti të rikthehej gradualisht në jetën normale. Ajo e përshkruan këtë periudhë si një rilindje.
“Kur kalon vdekjen, fillon ta shohësh jetën ndryshe. Çdo ditë bëhet dhuratë,” thotë ajo.
Sot, Valentina është në gjendje të mirë shëndetësore dhe shijon jetën pranë familjes së saj, duke e konsideruar betejën me sëmundjen si provën më të madhe të jetës. Rrëfimi i saj është një histori force, shprese dhe kuraje, që dëshmon se edhe përballë sëmundjeve më të rënda, vullneti për të jetuar dhe dashuria për familjen mund të bëhen arma më e fortë./K.C/dritare.net
