Çfarë duhet të mësojë Shqipëria nga sistemi i farmacive në Greqi! Flet Majlinda Leka
E Premte 10 Prill 2026, 21:09
Dritare.net
Një shqiptare është sot pjesë e një prej sistemeve më të rëndësishme të kontrollit farmaceutik në Greqi. Majlinda Leka punon prej vitesh në strukturat që monitorojnë dhe analizojnë recetat elektronike dhe funksionimin e farmacive në të gjithë vendin, duke kontribuar në transparencën dhe menaxhimin e sistemit shëndetësor.
E ftuar në emisionin Shqip nga Rudina Xhunga në DritareTV, Majlinda shpjegon se sistemi në të cilin punon përpunon një volum shumë të madh të dhënash, ku çdo muaj analizohen miliona receta elektronike që përshkruhen nga mjekët dhe ekzekutohen në farmaci. Ky proces siguron kontroll të plotë mbi përshkrimin e barnave dhe ndihmon në shmangien e abuzimeve.
Sistemi funksionon në bashkëpunim me Ministrinë e Shëndetësisë së Greqisë dhe EOPYY, të cilat mbikëqyrin rimbursimet dhe shpenzimet farmaceutike në nivel kombëtar.
Sipas Majlindës, çdo recetë regjistrohet dhe kontrollohet në mënyrë elektronike, duke ndjekur të gjithë zinxhirin: nga mjeku që e përshkruan, te farmacia që e jep dhe deri te pacienti që e merr. Kjo metodë lejon identifikimin e gabimeve, kontrollin e përdorimit të barnave dhe kursimin e fondeve publike.
“Gjithçka është e dixhitalizuar. Mund të kontrollohen miliona receta në kohë shumë të shkurtër,” shprehet ajo, duke theksuar se teknologjia ka ndryshuar rrënjësisht funksionimin e sistemit shëndetësor.
Sipas saj, përpara dixhitalizimit, procedurat ishin më të ngadalta dhe kontrolli më i vështirë, ndërsa sot sistemi modern ofron transparencë më të madhe dhe përshpejton proceset për farmacitë dhe pacientët.
Majlinda thekson gjithashtu se eksperienca e saj në këtë sektor mund të jetë e vlefshme edhe për Shqipërinë, duke sugjeruar se modele të ngjashme mund të ndihmojnë në përmirësimin e kontrollit dhe menaxhimit të sistemit farmaceutik./dritare.net
