Djali i Gjovalin Kadelit, në listat e hapura të PS-së. Admiri: Ja pse po kandidoj!
E Mërkurë 2 Prill 2025, 20:08
Dritare.net
Admir Kadeli kandidon në listat e hapura të PS-së për Lezhën. Ai është ekonomist, biznesmen dhe djali Gjovalin Kadelit, i cili ka qenë deputet i Partisë Socialiste para zgjedhjeve parlamentare të 23 qershorit 2013. Gjovalin Kadeli u nda nga jeta në maj të 2017-ës. Në gjurmët politike që shtroi i ati, po ecën edhe i biri, Admiri. Në një intervistë për Shqip nga Dritan Hila në DritareTV, Admiri tregon se përse vendosi të kandidojë për deputet të PS-së në listat e hapura për Lezhën.
“Një nga arsyet se përse unë vendosa të kandidoj për deputet ishte edhe për shkak të babait tim. Babai im më la një trashëgimi politike. Unë jam rritur më frymën politike në shtëpi prej Gjovalinit. Kjo frymë ka qenë e majtë. Unë e kisha shumë të lehtë vendosjen te PS-ja sepse i përkas krahut të majtë. Nuk mund të them se Lezha sot është e majtë apo e djathtë, sepse po ikën fryma e ideologjike. Kandidatët nuk i shohin si karton partie, por si njerëz. Unë po bëj pak kohë që jam në terren, edhe e bukura është që njerëzit po më presin. Tani është në dorën time sa mund t’ua marr votë njerëzve. Ai që nuk do të të votojë, nuk do të presë. Por ka shumë që po më presin mua dhe unë duhet t’u flas, t’u komunikoj, e t’i bind të votojnë për mua. Unë kam kuptuar që asnjë nuk kërkon atë që nuk i takon, por atë çfarë u takon.”, tregon Admir Kadeli në DritareTV./K.C/dritare.net
