Ndahet nga jeta Carla Fracci! Një jetë në fluturim, por me rrënjë të mbjella fort në tokë!
E Enjte 27 Maj 2021, 12:12
Dritare.net
Ndahet nga jeta Carla Fracci, një nga balerinat më të rëndësishme në botë. Ajo ndërroi jetë në moshën 84-vjeçare, pas luftës së gjatë me kancerin. E lidhur pazgjidhshmërisht me La Scala në Milano, Fracci e ka çuar talentin e saj në skenat e të gjithë botës.
Ndër interpretimet e paharrueshme të Fracci-t, ishin rolet romantike dhe dramatike, të cilat e kanë bërë atë një yll në të gjithë botën. Me hirin e saj ajo u ka dhënë formë personazheve të paharrueshme si Xhisiela, La Sylphide, Giulietta, Swanilda, Francesca da Rimini dhe Medea. Ajo kërceu me partnerët më të shquar në botën e vallëzimit: nga balerinët rusë Rudolf Nureyev dhe Vladimir Vassiliev, e deri tek Massimo Murru dhe Roberto Bolle.
Ajo jetoi në fluturim, por gjithmonë me rrënjë të mbjella fort në tokë.
"Unë u rrita mes fshatarëve, në një fshat afër Kremones, e lirë, mes shumë dashurive dhe nevojave të vërteta. Dhe pikërisht atje, të mbjella mirë në tokë, janë rrënjët e mia.”, tha Fracci kohë më parë. Dhe kështu, e hijshme dhe e fortë, e ëmbël dhe këmbëngulëse, shkoi një monument kombëtar italian./K.C/dritare.net
